16 قىركۇيەك كۇنى "ادىرنا" ۇلتتىق پورتالىندا "جاڭاقورعاندىقتار 3 ملن تەڭگەگە جۋىق قارجىعا مەملەكەتتىك تۋ ساتىپ الماق" دەگەن تاقىرىپپەن ماقالا جاريالاعان بولاتىن. سول ماتەريالعا جاڭاقورعان اۋدانىنىڭ قوعامدىق دامۋ ءبولىمى رەسمي جاۋاپ بەردى، دەپ حابارلايدى «ادىرنا» ءتىلشىسى.
اتالعان ماقالادا قىزىلوردا وبلىسىنىڭ جاڭاقورعان اۋدانىنىڭ قوعامدىق دامۋ ءبولىمى 2 677 457 تەڭگەگە مەملەكەتتىك تۋ ساتىپ الۋعا تەندەر جاريالاعانى، جاڭاقورعاندىقتار كولەمى 1ح2 مەتر - 413 دانا، كولەمى 1,5ح3 مەتر - 4 دانا، كولەمى 2ح4 مەتر - 4 دانا، بارلىعى 421 دانا مەملەكەتتىك تۋدى ساتىپ العالى وتىرعانى، ءار تۋدىڭ باعاسى 6 مىڭ تەڭگەدەن ءسال عانا اساتىنى، ت.ب جايلار ءسوز بولعان-دى. سونداي-اق ءبىز ءوز تاراپىمىزدان ءتيىستى مەكەمەگە "جاڭاقورعان اۋدانىنىڭ قوعامدىق دامۋ بولىمىنە 421 دانا مەملەكەتتىك تۋ نە ءۇشىن قاجەت بولىپ وتىر؟" "قازاقستان جۇرتشىلىعى الدا، 25 قازاندا رەسپۋبليكا كۇنىن، 16 جەلتوقساندا تاۋەلسىزدىك مەرەكەسىن تويلادى. ال ول مەرەكەلەرگە وسىنشاما كوپ تۋدىڭ قاجەتتىلىگى بار ما؟" دەگەن ساۋالدار جولداعان ەدىك.
جاڭاقورعان اۋدانىنىڭ قوعامدىق دامۋ ءبولىمى رەسمي جاۋابىندا:
“قايىرلى كۇن، قۇرمەتتى وقىرماندار! اتالعان ماسەلەگە بايلانىستى جاڭاقورعان اۋدانىنىڭ قوعامدىق دامۋ ءبولىمى كەلەسىنى حابارلايدى. "ادىرنا" اقپاراتتىق اگەنتتىگىنىڭ سايتىندا اتاپ كورسەتىلگەن (2 677 457 تەڭگە) قارجىعا جاڭاقورعان اۋدانى اكىمدىگىنە قاراستى 26 كەنت، اۋىلدىق وكرۋگتەرىنىڭ اكىمى اپپاراتى، 15 مەملەكەتتىك مەكەمەلەر مەن 25 كەنت، اۋىلدىق كلۋب ۇيلەرى سىرتقى (184 ەلتاڭبا، 421 تۋ) مەملەكەتتىك رامىزدەرمەن قامتاماسسىز ەتۋ كوزدەلگەن. مەملەكەتتىك مەكەمەلەر سىرتقى رامىزدەرمەن جىلىنا ءبىر رەت ءبىر ورتالىقتان "جاڭاقورعان اۋدانىنىڭ قوعامدىق دامۋ ءبولىمى" كمم-ءسى ارقىلى قامتاماسىز ەتىلەدى" دەلىنگەن.
قوش! رەسمي جاۋاپتا كورسەتىلگەن مەملەكەتتىك مەكەمەلەردىڭ سانى 66-دان اسپاي تۇر.
اۋدانداعى مەكتەپ، اۋرۋحانا، زاڭ مەكەمەلەرى، ت.ب قوسقاننىڭ وزىندە ءبىر اۋداندا 421 مەملەكەتتىك مەكەمەنىڭ بولۋى استە مۇمكىن ەمەس. سوندا اۋدان 2 677 457 تەڭگەگە ساتىپ العالى وتىرعان 421 تۋدى نە ىستەمەك؟
اسىل اباي
"ادىرنا" ۇلتتىق پورتالى
