16 qyrkúıek kúni "Adyrna" ulttyq portalynda "Jańaqorǵandyqtar 3 mln teńgege jýyq qarjyǵa memlekettik tý satyp almaq" degen taqyryppen maqala jarııalaǵan bolatyn. Sol materıalǵa Jańaqorǵan aýdanynyń qoǵamdyq damý bólimi resmı jaýap berdi, dep habarlaıdy «Adyrna» tilshisi.
Atalǵan maqalada Qyzylorda oblysynyń Jańaqorǵan aýdanynyń qoǵamdyq damý bólimi 2 677 457 teńgege memlekettik tý satyp alýǵa tender jarııalaǵany, jańaqorǵandyqtar kólemi 1h2 metr - 413 dana, kólemi 1,5h3 metr - 4 dana, kólemi 2h4 metr - 4 dana, barlyǵy 421 dana memlekettik týdy satyp alǵaly otyrǵany, ár týdyń baǵasy 6 myń teńgeden sál ǵana asatyny, t.b jaılar sóz bolǵan-dy. Sondaı-aq biz óz tarapymyzdan tıisti mekemege "Jańaqorǵan aýdanynyń qoǵamdyq damý bólimine 421 dana memlekettik tý ne úshin qajet bolyp otyr?" "Qazaqstan jurtshylyǵy alda, 25 qazanda Respýblıka kúnin, 16 jeltoqsanda Táýelsizdik merekesin toılady. Al ol merekelerge osynshama kóp týdyń qajettiligi bar ma?" degen saýaldar joldaǵan edik.
Jańaqorǵan aýdanynyń qoǵamdyq damý bólimi resmı jaýabynda:
“Qaıyrly kún, qurmetti oqyrmandar! Atalǵan máselege baılanysty Jańaqorǵan aýdanynyń qoǵamdyq damý bólimi kelesini habarlaıdy. "Adyrna" aqparattyq agenttiginiń saıtynda atap kórsetilgen (2 677 457 teńge) qarjyǵa Jańaqorǵan aýdany ákimdigine qarasty 26 kent, aýyldyq okrýgteriniń ákimi apparaty, 15 memlekettik mekemeler men 25 kent, aýyldyq klýb úıleri syrtqy (184 Eltańba, 421 tý) Memlekettik Rámizdermen qamtamassyz etý kózdelgen. Memlekettik mekemeler syrtqy rámizdermen jylyna bir ret bir ortalyqtan "Jańaqorǵan aýdanynyń qoǵamdyq damý bólimi" KMM-si arqyly qamtamasyz etiledi" delingen.
Qosh! Resmı jaýapta kórsetilgen memlekettik mekemelerdiń sany 66-dan aspaı tur.
Aýdandaǵy mektep, aýrýhana, zań mekemeleri, t.b qosqannyń ózinde bir aýdanda 421 memlekettik mekemeniń bolýy áste múmkin emes. Sonda aýdan 2 677 457 teńgege satyp alǵaly otyrǵan 421 týdy ne istemek?
Asyl Abaı
"Adyrna" ulttyq portaly
