پارلامەنت سەناتىنىڭ توراعاسى ماۋلەن اشىمباەۆ باستاعان اتوم ەلەكتر ستانساسىن سالۋدى قولداۋ جونىندەگى حالىقتىق شتابتىڭ مۇشەلەرى بۇگىن الماتى وبلىسىنا كەلدى. شتاب قۇرامىندا دەپۋتاتتار، ساراپشىلار جانە قوعام قايراتكەرلەرى بار. ولار وڭىردە كاسىپورىن ۇجىمدارىمەن، كاسىپكەرلەرمەن جانە جەرگىلىكتى جۇرتشىلىقپەن كەزدەسىپ، قازاقستاندا اەس سالۋعا قاتىستى رەفەرەندۋم وتكىزۋ ماسەلەلەرىن تالقىلادى.
ماۋلەن اشىمباەۆ وبلىس جۇرتشىلىعىمەن كەزدەسۋدە مەملەكەت باسشىسىنىڭ اەس سالۋ ماسەلەسىنە قاتىستى جالپىۇلتتىق رەفەرەندۋم وتكىزۋ تۋرالى باستاماسىنىڭ ماڭىزىنا نازار اۋداردى.
«بۇگىن ءبىز پرەزيدەنتىمىز قاسىم-جومارت كەمەلۇلى توقاەۆتىڭ اەس سالۋ ماسەلەسى بويىنشا جالپىۇلتتىق رەفەرەندۋم وتكىزۋ تۋرالى باستاماسىن تالقىلاۋ ءۇشىن ارنايى كەلىپ تۇرمىز. مۇنداي ماڭىزدى ماسەلەنى داۋىسقا سالۋ «حالىق ۇنىنە قۇلاق اساتىن مەملەكەت» تۇجىرىمداماسىنىڭ جارقىن كورىنىسى ەكەنى ءسوزسىز. اتوم ەلەكتر ستانساسىن سالۋ – ەلىمىزدىڭ ودان ءارى دامۋى ءۇشىن ماڭىزدى ماسەلە. بۇل رەتتە ءار ازاماتتىڭ داۋسى ۇلكەن مانگە يە. سوندىقتان ءبىز ەلدىڭ بولاشاعى ءۇشىن دۇرىس شەشىم قابىلداۋىمىز كەرەك», – دەدى ماۋلەن اشىمباەۆ.
سونداي-اق شتاب مۇشەلەرى ش.شوكين اتىنداعى قاپشاعاي گەس-ءىنىڭ قىزمەتىمەن تانىسىپ، ستانسا ماماندارىمەن جانە باسشىلىعىمەن كەزدەستى. وندا ەلدىڭ ەنەرگەتيكالىق سەكتورىن دامىتۋ پەرسپەكتيۆالارى تالقىلانىپ، وتاندىق كاسىپورىنداردى ەنەرگيامەن تۇراقتى قامتاماسىز ەتۋ جانە ەنەرگەتيكالىق تاۋەلسىزدىكتى نىعايتۋ ماسەلەلەرىنە باسا ءمان بەرىلدى.
«قازىرگى تاڭدا ەلدەگى بارلىق ەلەكتر ەنەرگياسىنىڭ باسىم بولىگىن كومىر ەلەكتر ستانسالارى بەرەدى. وسىنداي جاعدايدا بىزگە سەنىمدى جانە قاۋىپسىز ەنەرگيا كوزى قاجەت. اتوم ەنەرگەتيكاسى وسى ماسەلەنى وڭ شەشۋگە مۇمكىندىك بەرەدى. ويتكەنى ول تۇراقتى، ەكولوگيالىق تازا جانە قازاقستاندى ونداعان جىلدار بويى ەنەرگيامەن قامتاماسىز ەتە الادى. سونداي-اق ءوزىمىزدىڭ اتوم ەلەكتر ستانسامىزدى سالۋ ەلىمىزدىڭ كورشى مەملەكەتتەردەن ەلەكتر ەنەرگياسىن يمپورتتاۋدى ايتارلىقتاي قىسقارتۋعا ىقپال ەتەدى. بۇل قازاقستاننىڭ تولىق ەنەرگەتيكالىق تاۋەلسىزدىككە قول جەتكىزۋى ءۇشىن ايرىقشا ماڭىزعا يە جانە وتە وزەكتى», – دەدى ماۋلەن اشىمباەۆ.
سونىمەن قاتار شتاب مۇشەلەرى «DAMU» يندۋستريالىق-لوگيستيكالىق ايماعىندا شاعىن جانە ورتا بيزنەس وكىلدەرىمەن كەزدەستى، سونداي-اق، «GREEN Land ALATAU» جىلىجايىنا باردى.
دايىنداعان: «Nur Media».
تاپسىرىس بەرۋشى: وسپانوۆ م.ج.
«AMANAT» پارتياسى» قب قاراجاتىنان تولەندى
