Parlament Senatynyń Tóraǵasy Máýlen Áshimbaev bastaǵan Atom elektr stansasyn salýdy qoldaý jónindegi Halyqtyq shtabtyń músheleri búgin Almaty oblysyna keldi. Shtab quramynda depýtattar, sarapshylar jáne qoǵam qaıratkerleri bar. Olar óńirde kásiporyn ujymdarymen, kásipkerlermen jáne jergilikti jurtshylyqpen kezdesip, Qazaqstanda AES salýǵa qatysty referendým ótkizý máselelerin talqylady.
Máýlen Áshimbaev oblys jurtshylyǵymen kezdesýde Memleket basshysynyń AES salý máselesine qatysty jalpyulttyq referendým ótkizý týraly bastamasynyń mańyzyna nazar aýdardy.
«Búgin biz Prezıdentimiz Qasym-Jomart Kemeluly Toqaevtyń AES salý máselesi boıynsha jalpyulttyq referendým ótkizý týraly bastamasyn talqylaý úshin arnaıy kelip turmyz. Mundaı mańyzdy máseleni daýysqa salý «Halyq únine qulaq asatyn memleket» tujyrymdamasynyń jarqyn kórinisi ekeni sózsiz. Atom elektr stansasyn salý – elimizdiń odan ári damýy úshin mańyzdy másele. Bul rette ár azamattyń daýsy úlken mánge ıe. Sondyqtan biz eldiń bolashaǵy úshin durys sheshim qabyldaýymyz kerek», – dedi Máýlen Áshimbaev.
Sondaı-aq Shtab músheleri Sh.Shokın atyndaǵy Qapshaǵaı GES-iniń qyzmetimen tanysyp, stansa mamandarymen jáne basshylyǵymen kezdesti. Onda eldiń energetıkalyq sektoryn damytý perspektıvalary talqylanyp, otandyq kásiporyndardy energııamen turaqty qamtamasyz etý jáne energetıkalyq táýelsizdikti nyǵaıtý máselelerine basa mán berildi.
«Qazirgi tańda eldegi barlyq elektr energııasynyń basym bóligin kómir elektr stansalary beredi. Osyndaı jaǵdaıda bizge senimdi jáne qaýipsiz energııa kózi qajet. Atom energetıkasy osy máseleni oń sheshýge múmkindik beredi. Óıtkeni ol turaqty, ekologııalyq taza jáne Qazaqstandy ondaǵan jyldar boıy energııamen qamtamasyz ete alady. Sondaı-aq ózimizdiń atom elektr stansamyzdy salý elimizdiń kórshi memleketterden elektr energııasyn ımporttaýdy aıtarlyqtaı qysqartýǵa yqpal etedi. Bul Qazaqstannyń tolyq energetıkalyq táýelsizdikke qol jetkizýi úshin aıryqsha mańyzǵa ıe jáne óte ózekti», – dedi Máýlen Áshimbaev.
Sonymen qatar Shtab músheleri «DAMU» ındýstrııalyq-logıstıkalyq aımaǵynda shaǵyn jáne orta bıznes ókilderimen kezdesti, sondaı-aq, «GREEN Land ALATAU» jylyjaıyna bardy.
Daıyndaǵan: «Nur Media».
Tapsyrys berýshi: Ospanov M.J.
«AMANAT» partııasy» QB qarajatynan tólendi
