قىزىلوردا وبلىسىنىڭ جاڭاقورعان اۋدانىنىڭ قوعامدىق دامۋ ءبولىمى 2 677 457 تەڭگەگە 421 دانا مەملەكەتتىك تۋ ساتىپ الۋعا تەندەر جاريالادى، دەپ حابارلايدى «ادىرنا» ءتىلشىسى satypalu.gov.kz سايتىنا سىلتەمە جاساپ.
16 قىركۇيەك كۇنى جاڭاقورعان اۋدانىنىڭ قوعامدىق دامۋ ءبولىمى "مەملەكەتتىك رامىزدەردى ساتىپ الۋ" دەگەن تاقىرىپپەن تەندەر جاريالاعان. تەندەر جەڭىمپازى 23 قىركۇيەك كۇنى انىقتالادى.
مەملەكەتتىك ساتىپ الۋدىڭ تەحنيكالىق سيپاتتاماسىندا جاڭاقورعاندىقتار كولەمى 1ح2 مەتر - 413 دانا، كولەمى 1,5ح3 مەتر - 4 دانا، كولەمى 2ح4 مەتر - 4 دانا، بارلىعى 421 دانا مەملەكەتتىك تۋدى ساتىپ العالى وتىرعانى انىق جازىلعان.
سونداي-اق مەملەكەتتىك تۋدىڭ نەگىزگى كورسەتكىشتەرى مەن سيپاتتامالارى 988-2007 ستاندارتىنا سايكەس بولۋى، مەملەكەتتىك تۋداعى كۇن، قىران جانە ۇلتتىق ويۋ-ورنەكتىڭ ءتۇسى Pantone تۇستەر كاتالوگىنداعى №102 تالابىنا ساي كەلۋى كەرەكتىگى كورسەتىلگەن. تەندەر جەڭىمپازى كەلىسىم-شارت جاسالعان كۇننەن باستاپ 15 جۇمىس كۇنى ىشىندە تاۋاردى جاڭاقورعان كەنتىنە جەتكىزىپ بەرۋگە مىندەتتى.
2 677 457 تەڭگەنى 421 داناعا بولسەك، ءار تۋدىڭ باعاسى 6 مىڭ تەڭگەدەن ءسال عانا اسادى. اناۋ ايتقانداي تىم قىمبات ەمەس. بىراق، ءبىزدى "جاڭاقورعان اۋدانىنىڭ قوعامدىق دامۋ بولىمىنە 421 دانا مەملەكەتتىك تۋ نە ءۇشىن قاجەت بولىپ وتىر؟" دەگەن ساۋال مازالايدى. قازاقستان جۇرتشىلىعى الدا، 25 قازاندا رەسپۋبليكا كۇنىن، 16 جەلتوقساندا تاۋەلسىزدىك مەرەكەسىن تويلادى. ال ول مەرەكەلەرگە وسىنشاما كوپ تۋدىڭ قاجەتتىلىگى بار ما؟
جاڭاقورعاندىقتار بيۋدجەتتىڭ قارجىسىنا مەملەكەتىمىزدىڭ باستى ءرامىزىن ساتىپ الىپ، الدەبىر ۇراندى شارادا جالاۋلاتار. شارا بىتكەن سوڭ 421 دانا تۋ اياقتىڭ استىندا قالماسىنا كىم كەپىل؟
بۇل سۇراقتاردى ءتيىستى مەكەمەگە جولدادىق. ولاردان جەتكەن جاۋاپتى الداعى ۋاقىتتا جاريالايتىن بولامىز.
اسىل اباي
"ادىرنا" ۇلتتىق پورتالى
