Qyzylorda oblysynyń Jańaqorǵan aýdanynyń qoǵamdyq damý bólimi 2 677 457 teńgege 421 dana memlekettik tý satyp alýǵa tender jarııalady, dep habarlaıdy «Adyrna» tilshisi satypalu.gov.kz saıtyna silteme jasap.
16 qyrkúıek kúni Jańaqorǵan aýdanynyń qoǵamdyq damý bólimi "Memlekettik rámizderdi satyp alý" degen taqyryppen tender jarııalaǵan. Tender jeńimpazy 23 qyrkúıek kúni anyqtalady.
Memlekettik satyp alýdyń tehnıkalyq sıpattamasynda jańaqorǵandyqtar kólemi 1h2 metr - 413 dana, kólemi 1,5h3 metr - 4 dana, kólemi 2h4 metr - 4 dana, barlyǵy 421 dana memlekettik týdy satyp alǵaly otyrǵany anyq jazylǵan.
Sondaı-aq memlekettik týdyń negizgi kórsetkishteri men sıpattamalary 988-2007 standartyna sáıkes bolýy, memlekettik týdaǵy kún, qyran jáne ulttyq oıý-órnektiń túsi Pantone túster katalogyndaǵy №102 talabyna saı kelýi kerektigi kórsetilgen. Tender jeńimpazy kelisim-shart jasalǵan kúnnen bastap 15 jumys kúni ishinde taýardy Jańaqorǵan kentine jetkizip berýge mindetti.
2 677 457 teńgeni 421 danaǵa bólsek, ár týdyń baǵasy 6 myń teńgeden sál ǵana asady. Anaý aıtqandaı tym qymbat emes. Biraq, bizdi "Jańaqorǵan aýdanynyń qoǵamdyq damý bólimine 421 dana memlekettik tý ne úshin qajet bolyp otyr?" degen saýal mazalaıdy. Qazaqstan jurtshylyǵy alda, 25 qazanda Respýblıka kúnin, 16 jeltoqsanda Táýelsizdik merekesin toılady. Al ol merekelerge osynshama kóp týdyń qajettiligi bar ma?
Jańaqorǵandyqtar bıýdjettiń qarjysyna memleketimizdiń basty rámizin satyp alyp, áldebir urandy sharada jalaýlatar. Shara bitken soń 421 dana tý aıaqtyń astynda qalmasyna kim kepil?
Bul suraqtardy tıisti mekemege joldadyq. Olardan jetken jaýapty aldaǵy ýaqytta jarııalaıtyn bolamyz.
Asyl Abaı
"Adyrna" ulttyq portaly
