ينكليۋزيۆتى ءبىلىم بەرۋ جالپى ءبىلىم بەرۋ جۇيەسىنىڭ ماڭىزدى بۋىندارىنىڭ ءبىرى بولىپ ساپالى ءبىلىم بەرۋدىڭ قولجەتىمدىلىگىن قامتاماسىز ەتۋگە ارنالعان. 2020-2025 جىلدارعا ارنالعان «ينكليۋزيۆتى ءبىلىم بەرۋدى قولداۋدىڭ رەسۋرستىق كابينەتتەر جەلىسىن كەڭەيتۋ» باعدارلاماسى اياسىندا ەلىمىزدە ەرەكشە ءبىلىم بەرۋ قاجەتتىلىكتەرى بار بالالارعا ارنالعان كابينەتتەر اشىلۋدا.
ينكليۋزيانى قولداۋ كابينەتتەرىندە پەداگوگ-پسيحولوگتار، لوگوپەد-مۇعالىمدەر، الەۋمەتتىك پەداگوگتار، پەداگوگ-اسسيستەنتتەر اقپاراتتىق جانە كوممۋنيكاتيۆتىك كەدەرگىلەردى جويۋ، ەرەكشە ءبىلىم بەرۋ قاجەتتىلىكتەرى بار بالالاردى مەكتەپ ومىرىنە ارالاسۋ ءۇشىن قولايلى جاعدايلار جاساۋ بويىنشا جۇمىس ىستەيدى. بۇل ءار وقۋشىعا جەكە كوزقاراستى قامتاماسىز ەتەتىنى ءسوزسىز.
مىسالى، ينكليۋزيۆتى ءبىلىم بەرۋدى قولداۋدىڭ كەزەكتى كابينەتى كەشە استراحان اۋدانى استراحان اۋىلىنداعى №1 جالپى ءبىلىم بەرەتىن مەكتەپتە اشىلدى.
«ءبىزدىڭ اۋداندا بۇل ءۇشىنشى كابينەت. مۇندا لوگوپەد، دەفەكتولوگ، پسيحولوگ جانە الەۋمەتتىك پەداگوگ 12 بالامەن جۇمىس ىستەيتىن بولادى. كابينەت قاجەتتى جابدىقتار مەن جيھاز بار. بالالارعا جايلى بولۋ ءۇشىن پسيحوفيزيكالىق دامۋ ەرەكشەلىكتەرىن جانە پسيحولوگيالىق-مەديتسينالىق-پەداگوگيكالىق كونسۋلتاتسيانىڭ ۇسىنىمدارىن ەسكەرە وتىرىپ، كابينەت اشىق تۇستەرمەن بەزەندىرىلگەن»، - دەدى استراحان اۋدانىنىڭ ءبىلىم ءبولىمىنىڭ باسشىسى پولينا باراحوەۆا.
وبلىستا قازىر وسىنداي 66 كابينەت جۇمىس ىستەيدى، بۇل بارلىق بالالار ءۇشىن قولايلى جاعدايلار مەن تەڭ مۇمكىندىكتەر جاساۋداعى ماڭىزدى قادام بولىپ تابىلادى. 1100-دەن ارتىق بالامەن 200-دەن استام پەداگوگ اينالىسادى.
ەستەرىڭىزگە سالا كەتەيىك، كونستيتۋتسيا كۇنى قارساڭىندا 15 كابينەت اشىلدى. جىل سوڭىنا دەيىن تاعى 20 اشىلۋى جوسپارلانۋدا.
كابينەتتەردىڭ اشىلۋىنا ۇكىمەتتىك ەمەس ۇيىمدار دا تارتىلاتىنىن اتاپ وتكىمىز كەلەدى، مىسالى، «قازاقستان حالقىنا»، «دارا»، «باق»، «بولاشاق» قوعامدىق قورلارى. قازىرگى ۋاقىتتا 2026-2027 جىلدارعا ارنالعان ينكليۋزيانى قولداۋ كابينەتتەرىن اشۋ جوسپارى ازىرلەنۋدە.
