توقاەۆ بەردىبەك ساپارباەۆتى مينيستر قىزمەتىنەن بوساتتى

بەردىبەك ساپارباەۆ پرەمەر-ءمينيستردىڭ ورىنباسارى قىزمەتىنە تاعايىندالدى، دەپ حابارلايدى اقوردا.

"بەردىبەك ماشبەكۇلى ساپارباەۆ قازاقستان رەسپۋبليكاسى پرەمەر-ءمينيسترىنىڭ ورىنباسارى بولىپ تاعايىندالسىن، ول ەڭبەك جانە حالىقتى الەۋمەتتىك قورعاۋ ءمينيسترى قىزمەتىنەن بوساتىلسىن", - دەپ جازىلعان توقاەۆتىڭ جارلىعىندا.

بۇعان دەيىن ۆيتسە-پرەمەر قىزمەتىن گۇلشارا ابدىقالىقوۆا اتقارعان بولاتىن. ول دەپۋتات مانداتىن الدى.

پرەمەر-ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆ. ۇكىمەت باسشىسىنىڭ تاعى ءبىر ورىنباسارى - جەڭىس قاسىمبەك.

بەردىبەك ساپارباەۆ تۋرالى نە بىلەمىز؟

بەردىبەك ساپارباەۆ ەڭبەك جانە حالىقتى الەۋمەتتىك قورعاۋ ءمينيسترى قىزمەتىن اتقاردى. بۇعان دەيىن اقتوبە وبلىسىنىڭ اكىمى بولدى.

ءتۇرلى جىلدارى مينيسترلەر كابينەتى اپپاراتىنىڭ جەتەكشىسى، قىزىلوردا، وڭتۇستىك قازاقستان وبلىستارىنىڭ اكىمى، كەدەندىك باقىلاۋ اگەنتتىگىنىڭ توراعاسى، قارجى ءمينيسترىنىڭ ورىنباسارى قىزمەتىن اتقاردى.

2009 جىلدىڭ 4 ناۋرىزىنان باستاپ 2014 جىلدىڭ 11 قاراشاسى ارالىعىندا شىعىس قازاقستان وبلىسىنىڭ اكىمى بولدى. 2014 جىلدىڭ قاراشا ايىنان باستاپ پرەمەر-ءمينيستردىڭ ورىنباسارى بولدى.