ەكس-مينيستر ارىستانبەك مۇحامەديۇلى كەزىندە ارزانعا ساتىپ العان نىساندارىن مەملەكەت مەنشىگىنە قايتارىپ جاتىر. بۇل تۋرالى قازاقستان رەسپۋبليكاسىنىڭ باس پروكۋراتۋراسى مالىمدەدى، دەپ حابارلاي “ادىرنا” ۇلتتىق پورتالى.
مالىمەتكە سۇيەنسەك، پروكۋرورلار 4,8 ملرد تەڭگەدەن استام سوماعا مۇلىكتى مەملەكەت مەنشىگىنە قايتارۋ تۋرالى تالاپقا باستاماشى بولعان. سوت ازىرگە ءبىر تالاپتى عانا قاناعاتتاندىرعان.
«ماسەلەن، 2019 جىلى بۇرىنعى مادەنيەت ءمينيسترى مۇحامەديۇلىمەن ۇلەستەس جەكە كومپانيا 332 ملن تەڭگەگە سۋ جانە قولدانبالى سپورت تۇرلەرى بويىنشا رەسپۋبليكالىق جوعارى سپورت شەبەرلىگى مەكتەبىن ساتىپ العان. الماتى قالاسىندا ورنالاسقان كاسىپورىن ساتىلعانعا دەيىن 662 ملن تەڭگەگە باعالانعان. بىراق، بۇنداي نىساننىڭ نارىقتاعى قۇنى 1,213 ملرد تەڭگە»، - دەپ حابارلايدى باس پروكۋراتۋرا.
الماتى قالاسىنىڭ پروكۋراتۋراسى كاسىپورىندى ساتىپ الۋ-ساتۋ شارتىن جارامسىز دەپ تانۋ تۋرالى تالاپ قويعان.
«سونىمەن قاتار، استانا جانە الماتى قالالارىندا بۇرىنعى مادەنيەت ءمينيسترى مۇحامەديۇلىمەن بايلانىستى كومپانيالارعا 3,5 ملرد تەڭگەدەن استام سوماعا ساتىلعان تاعى ءۇش وبەكتىنى مەملەكەت مەنشىگىنە قايتارۋ تۋرالى تالاپ سوتتا تالقىلانىپ جاتىر. بۇل ءىس بويىنشا ۇلىتاۋ وبلىسىنىڭ پروكۋراتۋراسى قاراعاندى مەملەكەتتىك مۇلىك دەپارتامەنتى باسشىلارىنىڭ ءبىرىن سوتقا بەرگەن»، - دەپ جازادى پروكۋراتۋرا.
ايتا كەتەيىك، ارىستانبەك مۇحامديۇلى وكىلەتتىلىگىن تەرىس پايدالانعانى ءۇشىن جانە اسا ءىرى مولشەرجە قاراجات ۇرلاپ، رەيدەرلىك جاساعانى ءۇشىن 11 جىلعا سوتتالعان ەدى.
