كوكشەتاۋدا قالاسىنىڭ تاۋەلسىزدىك الاڭىندا كونستيتۋتسيا كۇنىنە ارنالعان مەرەكەلىك ءىس-شارا ءوتتى. سالتاناتتى شارادا ءسوز سويلەگەن اقمولا وبلىسىنىڭ اكىمى مارات احمەتجانوۆ قازاقستان رەسپۋبليكاسىنىڭ كونستيتۋتسياسى – ەلىمىزدىڭ ءاربىر ازاماتىنىڭ قۇقىقتارى مەن بوستاندىقتارىنىڭ نەگىزى، قوعامنىڭ تۇراقتىلىعى مەن دەموكراتيالىق دامۋىنىڭ كەپىلى ەكەنىن ايتتى.
«كونستيتۋتسيا كۇنى مەرەكەسىنىڭ قازاقستاندىقتار ءۇشىن جىلدان جىلعا ماڭىزى ارتىپ كەلەدى. ەلىمىزدە بولىپ جاتقان وڭ وزگەرىستەرگە بارلىعىڭىز كۋا بولىپ وتىرسىزدار. بۇل جەتىستىكتەردىڭ بارلىعىنا كونستيتۋتسيانىڭ نەگىزگى نورمالارى مەن پرينتسيپتەرى ارقىلى قول جەتكىزىلدى. ءبىز ەل مەن ءوڭىردى دامىتۋعا باعىتتالعان ماڭىزدى مىندەتتەردى ودان ءارى شەشە الاتىنىمىزعا سەنىمدىمىز»، - دەپ اتاپ ءوتتى وبلىس اكىمى.
مەرەكە اياسىندا، جەتىم جانە اتا-اناسىنىڭ قامقورلىعىنسىز قالعان بالالار، كوپ بالالى وتباسىلار جانە حالىقتىڭ الەۋمەتتىك وسال توپتارىنداعى 22 وتباسىعا جاڭا پاتەردىڭ كىلتى تابىستالدى.
باسپانالى بولعانداردىڭ اراسىندا 17 جىل پاتەر كەزەگىندە تۇرعان دينارا وماروۆا دا بار.
«وسى قۋانىشتى كۇنى مەملەكەت باسشىسىنا كورسەتكەن كومەگى ءۇشىن شىن جۇرەكتەن العىس ايتقىم كەلەدى. مەنىڭ وتباسىم 17 جىل كەزەكتە تۇردى. ەندى ءبىزدىڭ ارمانىمىز ورىندالدى، ءبىزدىڭ ءوز باسپانامىز بار، جارقىن جانە جايلى» - دەپ ءبولىستى ءوز قۋانىشىمەن دينارا وماروۆا.
سونداي-اق، وسىنداي ايتۋلى كۇنى وبلىس اكىمى 24 مەديتسينالىق جەدەل جاردەم كولىگى مەن 5 مەكتەپ اۆتوبۋسىنىڭ كىلتىن تابىستادى.
«جاڭا جەدەل جاردەم كولىكتەرى تەك تەحنيكا ەمەس. بۇل ءبىزدىڭ ازاماتتارىمىزدىڭ دەنساۋلىعى مەن ءال-اۋقاتىنا قوسقان ۇلەسى. بۇل اۆتوموبيلدەر ءاربىر اقمولالىققا ۋاقىتىلى مەديتسينالىق كومەك كورسەتۋدى قامتاماسىز ەتە وتىرىپ، حالىقتىڭ يگىلىگىنە قىزمەت ەتەتىن بولادى» – دەپ اتاپ ءوتتى م.احمەتجانوۆ.
سالتاناتتى ءىس-شارا اياسىندا وبلىستىڭ دامۋىنا ۇلەس قوسقان ءبىر توپ اقمولالىق «قۇرمەت» جانە «ەڭبەك داڭقى» وردەندەرىمەن، «ەرەن ەڭبەگى ءۇشىن» مەدالدارىمەن ماراپاتتالدى.
ايتا كەتەيىك، اتا زاڭىمىزدىڭ 29 جىلدىعىندا وبلىس ورتالىعىنداعى سارىارقا شاعىناۋدانىندا ەرەكشە بالالارعا ارنالعان بالاباقشا پايدالانۋعا بەرىلدى.
سونىمەن قاتار، بۋراباي اۋدانىنىڭ بۋراباي كەنتىندە قوسالقى ستانتسيا، زەلەنىي بور اۋىلىنداعى مادەنيەت ءۇيى جانە سپورت كەشەنى دە ەل يگىلىگىنە بەرىلدى. اتباسار اۋدانىنداعى «BAXA SӦHNE» جشس سۇلى جارماسىن ءوندىرۋ فابريكاسى ىسكە قوسىلدى.
