Stopfake.kz سايتى 15 قىركۇيەكتەن باستاپ ەلىمىزدە ماسكا تاعۋ رەجيمى ەنگىزىلىپ، وقۋشىلار قاشىقتىقتان وقۋعا جىبەرىلەتىنى تۋرالى ايتىلعان اقپاراتتى تەكسەردى.
قر سانيتارلىق-ەپيدەميولوگيالىق باقىلاۋ كوميتەتى بۇل اقپاراتقا قاتىستى پىكىر ءبىلدىردى.
«مەسسەندجەرلەردە 15 قىركۇيەكتەن باستاپ بالالاردى قاشىقتان وقىتۋعا جىبەرەدى جانە مەكەمەلەردە ماسكامەن ءجۇرۋ رەجيمى ەنگىزىلەدى دەگەن اقپارات شىندىققا جاناسپايدى. جىل سايىن ەپيدەميالىق ماۋسىم كەزەڭىندە پروفيلاكتيكالىق جانە ەپيدەمياعا قارسى ءىس-شارالاردى وتكىزۋدى كوزدەيتىن قر باس مەملەكەتتىك سانيتاريالىق دارىگەرىنىڭ قاۋلىسى بەكىتىلەدى. قاۋلىعا سايكەس، بيىلعى جىلدىڭ 15 قىركۇيەگىنەن باستاپ تۇماۋعا قارسى ۆاكتسيناتسيا جۇرگىزۋ باستالادى. ماسكا تاعۋ رەجيمى تەك مەديتسينالىق ۇيىمداردىڭ قىزمەتكەرلەرى ءۇشىن عانا ەنگىزىلەدى»، - دەلىنگەن حابارلامادا.
