بۇگىن، 23 تامىزدا جايىقتىڭ اق شاعالاسى اتانعان بەلگىلى اقىن اقۇشتاپ باقتىگەرەەۆا 80 جاسقا تولدى، دەپ حابارلايدى «ادىرنا» ءتىلشىسى.
قازاقستاننىڭ ەڭبەك سىڭىرگەن قايراتكەرى، «الاش» حالىقارالىق ادەبي سىيلىعىنىڭ يەگەرى باتىس قازاقستان وبلىسى اقجايىق اۋدانى اقجايىق اۋىلىندا تۋعان. 1966 جىلى قازاق مەملەكەتتىك قىزدار پەدينستيتۋتىنىڭ فيلولوگيا فاكۋلتەتىن تامامداعان.
اقىن ءار جىلدارى ورال وبلىستىق «ورال ءوڭىرى»، تالدىقورعان وبلىستىق «وكتيابر تۋى»، رەسپۋبليكالىق «قازاق ادەبيەتى» گازەتتەرىندە ادەبي قىزمەتكەر، «قازاقفيلم» كينوستۋدياسىندا رەداكتور، «جازۋشى» باسپاسىنىڭ اۋدارما رەداكتسياسىندا رەداكتور بولىپ جۇمىس ىستەدى.
تۇڭعىش ولەڭدەر جيناعى «ءورىمتال» 1967 جىلى جارىق كوردى. اقۇشتاپ باقتىگەرەەۆانىڭ «قانىشىم – ىڭكارىم» (1971), «سەنى ويلايمىن» (1973), «اق قانات» (1975), «باقىت ءانى» (1978), «جايىق قىزى» (1980), «بەلوكرىلايا» (1981), «اقجەلەڭ» (1985), «سۇمبىلە» (1990) اتتى كىتاپتارى باسىلىپ شىقتى.
بۇعان دەيىن ول جۋرناليستەرگە بەرگەن سۇقباتىندا قازاق قىزدارىنىڭ عاسىرعا ساي ساۋاتتى بولۋىن ارماندايتىنىن ايتقان ەدى.
«قازاق دەگەن ۇلتتىڭ نامىسىن قورعايتىن، تاريحىن تەرەڭ بىلەتىن، ۇلتتىڭ اناسى بولاتىن دارەجەدە، اسقان اقىلدى بولسا ەكەن دەيمىن. قازاق قىزىن تاربيەلەۋ – ءالى دە مەنىڭ كوكەيىمدە جۇرگەن ۇلكەن ماسەلە. جالپى، قازاق قىزىن ۇلت بولىپ تاربيەلەمەسەك، ءبىز ۇلتتىق بولمىسىمىزدان ايرىلامىز با دەپ قورقامىن. قازىر مەنىڭ جىر جولىمداعى ءتورت شۋماعىمدى قىزدار جاتقا ايتىپ ءجۇر.
«بولماۋ كەرەك ءسۇيۋدىڭ جولى جاڭا،
قىز ۇلەسى قاشاندا بولۋ انا.
«جانىم» دەگەن جىگىتتى جەك كورمەڭدەر،
ءوزى ءسۇيۋ قىزداردىڭ سورى عانا...»
مەن وسى جولدار ارقىلى كورگەن-بىلگەنىمدى، قازاقتىڭ ايەلى كەشكەن نارسەنى ايتقىم كەلەدى. انا بولۋ، بەسىك تەربەتۋ، قوعامعا قىزمەت جاساۋ، ۇلتتى ءسۇيۋ – مىنە وسىنىڭ ءبارى از شارۋا ەمەس. ماحاببات جولىندا قىز بالا ەشقاشان ءوزى سۇيەم دەپ ايتپاۋى كەرەك. قازاق قىزى تاكاپپار، نازىك، ءور، وتە پاراساتتى، ءوزىن وزگەگە سىيلاتا ءبىلۋى كەرەك. بالكىم، بىرەۋلەر مۇنى ۇساق تاقىرىپ دەيتىن بولار. جوق، بارلىق تىرشىلىك ايەلدىڭ قولىندا. ەرلەردىڭ باقىتى دا قىزداردىڭ قولىندا. مەن قازاقتىڭ دانا ايەلدەرى تاربيەلەگەن ۇرپاقپىن. ۇلتتىڭ اناسى بولۋ – مەنىڭ ەندىگى ارمانىم...»—دەدى اقىن.
