اقمولا وبلىسى دەنساۋلىق ساقتاۋ باسقارماسىنىڭ مالىمەتىنشە، جاقسى اۋداندىق اۋرۋحاناسىندا جەرگىلىكتى دارىگەرلەر يليزاروۆ اپپاراتىنىڭ كومەگىمەن 38 جاستاعى ناۋقاستىڭ سول جاق اياق سۇيەگىنىڭ ورتاڭعى بولىگىندەگى اشىق كوپجارىلى سىنۋىنا وتا جاسادى. ناۋقاس جاراقاتتى باسپالداقتان قۇلاعان كەزدە تۇرمىستىق جاعدايدا العان.
«يليزاروۆ اپپاراتى ارقىلى جاسالاتىن سۇيەك ديستراكتسيالىق وستەوسينتەز وتاسى ۇزىن تۇتىك ءتارىزدى سۇيەكتەردىڭ اشىق سىنۋىن ەمدەۋدەگى الەمدىك ستاندارت. بۇل ءادىس ناۋقاستىڭ وتادان كەيىنگى كۇنى-اق بەلسەندىلىك تانىتىپ، وتا جاسالعان اياققا تۇرۋىنا مۇمكىندىك بەرەدى، ۇزاق توسەك تارتىپ جاتۋدىڭ الدىن الادى»، - دەپ اتاپ ءوتتى وتاعا قاتىسقان حيرۋرگيا ءبولىمىنىڭ مەڭگەرۋشىسى امانجول نۇرمۇحامەتوۆ.
وتا ءبىر جارىم ساعاتقا سوزىلدى. ونى ەكى حيرۋرگ - امانجول نۇرمۇحامەتوۆ جانە ەمدەۋ ءىسى جونىندەگى باس دارىگەردىڭ ورىنباسارى جانايدار قاجدەنبەكوۆ جۇرگىزدى. يليزاروۆ اپپاراتىن قولدانۋدىڭ ارقاسىندا ناۋقاستىڭ سىنعان سۇيەگىنىڭ تەزىرەك ءبىتىسىپ كەتۋىنە قولايلى جاعداي جاسالادى.
ناۋقاس بىرنەشە كۇن ستاتسيوناردا بولىپ، كەيىن امبۋلاتوريالىق ەمدەۋگە اۋىستىرىلادى. ايتا كەتۋ كەرەك، جاقسى اۋداندىق اۋرۋحاناسىنىڭ حيرۋرگيا بولىمىندە ەكسترامەدۋليارلىق وستەوسينتەز، ءوت جولى تاستارىنا، جارىقتارعا جانە گەموررويدەكتومياعا قاتىستى كۇردەلى وتالار دا جاسالادى، سونداي-اق تاۋلىك بويى شۇعىل حيرۋرگيالىق جانە گينەكولوگيالىق كومەك كورسەتىلەدى.
«ءبىز حيرۋرگيالىق بازامىزدى بەلسەندى دامىتىپ جاتىرمىز جانە جاڭا ينترامەدۋليارلىق وستەوسينتەز ءادىسىن ەنگىزۋدى جوسپارلاپ وتىرمىز. ول ءۇشىن قاجەتتى قۇرال-جابدىقتار مەن ماتەريالدار ساتىپ الىنۋدا»، - دەدى امانجول نۇرمۇحامەتوۆ.
سوڭعى ەكى ايدا اۋرۋحانانىڭ حيرۋرگيا بولىمىندە دارىگەرلەر 50-دەن استام وتا جاسادى، بۇل مەديتسينا قىزمەتكەرلەرىنىڭ جوعارى بىلىكتىلىگى مەن تاجىريبەسىن دالەلدەيدى.
