بۇگىن، 21 تامىزدا استانا قالاسىنىڭ اكىمى جەڭىس قاسىمبەك پاريج وليمپياداسىنىڭ كۇمىس جۇلدەگەرى نۇربەك ورالباي مەن ونىڭ جاتتىقتىرۋشىسىنا ارنايى سىيلىق تابىستادى، دەپ حابارلايدى «ادىرنا» ءتىلشىسى.
«پاريجدە وتكەن وليمپيادا ويىندارىنىڭ كۇمىس جۇلدەگەرى نۇربەك ورالبايمەن جانە ونىڭ جاتتىقتىرۋشىسى اسقار ەركەباەۆپەن كەزدەستىم. نۇربەك ورالباي ەلىمىزدىڭ ءارى قالامىزدىڭ اتىنان سىنعا ءتۇستى. ونىڭ بۇل جەتىستىگىنىڭ ارتىندا مىڭداعان ساعاتتىق جاتتىعۋلار، سول سياقتى وتباسىنىڭ، جاتتىقتىرۋشىسىنىڭ جانە تۋىستارىنىڭ قولداۋى مەن وزىنە دەگەن سەنىمى جاتىر. دەمەۋشىلەر ەسەبىنەن نۇربەك ورالبايعا Land Rover Defender اۆتوكولىگىنىڭ كىلتى، ال جاتتىقتىرۋشىسىنا 10 ملن تەڭگەنىڭ سەرتيفيكاتى تابىس ەتىلدى. سپورتشىلارىمىزعا بيىك شىڭداردى باعىندىرۋىن تىلەيمىن!»– دەدى ول جەلىدەگى پاراقشاسىندا.
ەسكە سالايىق، بۇعان دەيىن NNN لاقاپ اتىمەن تانىلعان بلوگەر نۇرداۋلەت بەكتۇرسىن سپورتشىعا ZEEKR كولىگىن سىيلاعان ەدى.
