"قايرات" فۋتزال كلۋبىنىڭ بۇرىنعى ويىنشىسى دۋگلاس نۋنەس دا سيلۆاعا بەلگىسىز بىرەۋلەر تۇنگى كلۋبتان شىعىپ بارا جاتقان كەزىندە وق اتقان. بۇل مالىمەتتى برازيليانىڭ "كورينتيانس" كومانداسىنىڭ وكىلدەرى راستادى، - دەپ حابارلايدى Vesti.kz.
سپورت پورتالىنىڭ مالىمەتىنشە، 27 جاستاعى نۋنەس كومانداسىنداعى دوستارىمەن تۇنگى كلۋبقا بارعان. بىراق فۋتبولشىلار تۇنگى كلۋبتاعى باسقا ادامدارمەن سوزگە كەلىپ، ناتيجەسىندە شىعابەرىستە اتىس بولعان. وكىنىشكە قاراي، فۋتبولشىنىڭ ءومىرىن امان الىپ قالۋ مۇمكىن بولمادى. پوليتسەيلەر قىلمىسكەردى ىزدەستىرۋ جۇمىستارىن باستادى.
"كورينتيانس" كلۋبىنىڭ باس باپكەرى اندرە بيە وسى جاعدايدان كەيىن پوليتسياعا بارعان. "ناقتى نە بولعانىن ايتا المايمىن، سەبەبى ول كەزدە مەن ۇيىقتاپ جاتتىم. قازىر وقيعانىڭ ءمان-جايىن ءبىلۋ ءۇشىن پوليتسيا ۋچاسكەسىنە كەلدىم. ونىڭ سول دەمالىس كۇنى كومانداداعى ويىنشىلارمەن بىرگە بولعانىن بىلەمىن", - دەدى بيە.
