قارجى پيراميداسى-الاياقتىقتىڭ ەڭ كوپ تاراعان ءتۇرى. ءاپ، ساتتە بايىپ، قىراۋار قارجىنى قالتاعا باسامىن دەگەن قۇر سوزگە الدانىپ، كەرىسىنشە سوڭعى تيىنىن ساناپ بەرۋگە اكەلەتىن، اككى قۋلاردىڭ قۇرىق بايلاتپايتىن جۇيەسى. الاياقتار وزدەرىنىڭ ينۆەستيتسيالىق ۇسىنىستارى ۇلكەن پايدا اكەلۋگە كەپىلدىك بەرەتىن جاڭا، پەرسپەكتيۆالى تەحنولوگيالارمەن نەمەسە بىرەگەي نارىقتىق مۇمكىندىكتەرمەن بايلانىستى دەپ ءجيى ايتادى. بۇل تۋرالى بيلىك پەن قارجى ساراپشىلارى دابىل قاعۋدا. سوندىقتان، مەملەكەتتە اتالمىش جۇيمەن كۇرەس قارقىندى.
بيىلعى جىلى قر قارجىلىق مونيتورينگ اگەنتتىگىنىڭ ىقپالىمەن «قارجى پيراميدالارىنا قارسى ءىس-قيمىل» ارنايى جوباسى ىسكە قوسىلدى. باستى ماقسات-الاياقتاردىڭ جولىن كەسۋ جانە ولارعا تارتىلعان سالىمشىلار سانىن قىسقارتۋ.
بىرەگەي جوبا كوپ كۇتتىرمەي ءوز ناتيجەسىندە بەرۋدە. IT قۇرالدارىن پايدالانا وتىرىپ، قارجى پيراميدالارىنىڭ قۇرىلعان ساتىنەن باستاپ، ەرتە انىقتاۋ ءۇشىن الەۋمەتتىك جەلىلەرگە تالداۋ جۇرگىزىلىپ، اۋديتورياسى 600 مىڭ ادامدى قامتىعان، مىڭعا جۋىق قارجى پيراميدالارىنىڭ بەلگىلەرى بار سايتتار مەن شوتتاردىڭ سىلتەمەسى بۇعاتتالدى.
جاۋاپتىلاردىڭ سوزىنە سۇيەنسەك، تەك سوڭعى التى ايدا ينتەرنەت جەلىسىندە 36 قارجى پيراميداسى انىقتالدى.
ولار بويىنشا «WhatsApp»، «Telegram» جانە «Instagram» الەۋمەتتىك جەلىلەرىندە 200 چات انىقتالعان. بۇگىنگى تاڭدا 182 چات بۇعاتتالدى. وسىلايشا، 126 مىڭ ازاماتتىڭ ودان ءارى قارجىلىق شىعىندارىنىڭ الدى الىندى.
73 مىڭ اۋديتورياسى بار، «Eolus»، «نيسا»، «GPIBS»، «داري پولۋچاي»، «چارويت»، «Carhomi»، «Beefre» سىندى 7 ءىرى شەتەلدىك جوبا بويىنشا سوتقا دەيىنگى تەرگەۋ باستالدى. «Eolus» قارجىلىق پيراميداسى بويىنشا سوت ۇكىمى شىققان.
قارجى پيراميداسىن قۇرعانى ءۇشىن قىلمىستىق جاۋاپكەرشىلىك كوزدەلگەنىن جانە مۇلكى تاركىلەنىپ، 10 جىلعا دەيىنگى مەرزىمگە باس بوستاندىعىنان ايىرىلۋ جازاسى تاعى بار.
پيراميدالار ادەتتە ازاماتتارعا جوعارى جانە جىلدام كىرىستەر تۋرالى ۋادەلەر بەرىپ، بىراق ءىس جۇزىندە نەگىزگى پايدا جاڭادان تارتىلعان قاتىسۋشىلاردىڭ ەسەبىنەن كەلەدى. پيراميدانىڭ قۇرىعىنا ىلىككەن جاندار اسا ۇلكەن قارجىلىق شىعىنعا ۇشىرايدى. ويسىز ارەكەتتىڭ سالدارىنان سان سوعىپ قالماس ءۇشىن، الدىمەن كومپانيا جايلى زەردەلەۋ قاجەت.
كومپانيانىڭ زاڭدىلىعىنا ەرەكشە نازار اۋدارۋ كەرەك. قارجى پيراميدالارى زاڭدى بيزنەستىڭ كورىنىسىن جاساۋ ءۇشىن جالعان قۇجاتتاردى، جالعان ليتسەنزيالاردى جانە باسقا امالداردى قولدانا الادى. اقشانى ينۆەستيتسيالاماس بۇرىن، كومپانيادا ليتسەنزيالار مەن باسقا دا قاجەتتى قۇجاتتاردى تەكسەرىڭىز.
ينۆەستيتسيالىق مۇمكىندىكتەردى ۇسىناتىن كەز-كەلگەن كومپانيانىڭ ءتيىستى ليتسەنزيالارى بولۋى جانە ۋاكىلەتتى ورگانداردا تىركەلۋى كەرەك. ەگەر كومپانيادا ليتسەنزيالار بولماسا نەمەسە كۇمان تۋدىرسا، بۇل جوبادان باس تارتۋ قاجەت. سونداي-اق، كومپانيانىڭ تاۋەلسىز ۇيىمداردىڭ وڭ رەيتينگتەرى بار ەكەنىنە كوز جەتكىزىڭىز.
تىم جىلدام جانە جوعارى كىرىستى ۋادە ەتسە، وندا كۇدىكتەنۋ كەرەك. ويتكەنى، قارجى پيراميدالارى كوبىنەسە قىسقا مەرزىمدە شىندىققا جاناسپايتىن جوعارى كىرىستى ۋادە ەتەدى. كومپانيانى زەرتتەپ، وعان قاتىستى پىكىرلەرگە نازار اۋدارىڭىز. كەز-كەلگەن كومپانياعا نەمەسە ينۆەستيتسيالىق جوباعا اقشا سالماس بۇرىن، ونىڭ بەدەلىن زەرتتەۋگە ۋاقىت ءبولىڭىز. باسقا ينۆەستورلاردىڭ پىكىرلەرىن وقىڭىز جانە كەڭەس الۋ ءۇشىن قارجى ساراپشىلارىنا حابارلاسقان ابزال.
ستاندارتتى ەمەس ينۆەستيتسيالىق مۇمكىندىكتەردەن ساق بولىڭىز. كريپتوۆاليۋتاعا، فورەكسكە جانە باسقا ستاندارتتى ەمەس اكتيۆتەرگە ينۆەستيتسيالاۋ وتە قاۋىپتى بولۋى مۇمكىن جانە ءسىزدى قارجىلىق شىعىندارعا ۇشىراتۋى ىقتيمال.
قارجىلىق كەڭەسشىلەرمەن بايلانىسىڭىز. ينۆەستيتسيا جاساماس بۇرىن قارجى جانە ينۆەستيتسيا سالاسىنداعى ماماندارعا حابارلاسىڭىز. ولار سىزگە اقىلعا قونىمدى شەشىم قابىلداۋعا جانە قارجى پيراميداسىنان اۋلاق بولۋعا كومەكتەسەدى.
تاعى ءبىر ەسكەرەتىن جايت جوباعا جاڭا قاتىسۋشىلاردى تارتۋعا باسا نازار اۋدارۋ. كوپتەگەن قارجى پيراميدالارىندا بار قاتىسۋشىلاردىڭ كىرىستەرى جاڭا قاتىسۋشىلاردىڭ جارنالارىنا تىكەلەي بايلانىستى. الاياقتار قۇرباندارىن دوستارىن، تۋىستارىن جانە تانىستارىن بەلسەندى تۇردە تارتۋعا ىنتالاندىرادى، ءار جاڭا مۇشە ءۇشىن بونۋستار ۋادە ەتەدى. الايدا، زاڭدى ينۆەستيتسيالىق جوبالاردا كىرىستەر جاڭا ينۆەستورلاردى تارتۋعا تاۋەلدى ەمەس ەكەنىن ەستە ۇستاعان ءجون. ەگەر كومپانيا ءوز ءونىمىن نەمەسە قىزمەتىن دامىتۋعا ەمەس، مۇشەلەر جەلىسىن كەڭەيتۋگە باسا نازار اۋدارسا، بۇل پيراميدانىڭ بەلگىسى بولۋى مۇمكىن.
سونداي-اق كومپانيا قىزمەتىنىڭ اشىقتىعىنا نازار اۋدارۋ ماڭىزدى.
قارجى پيراميداسىنىڭ كەزەكتى بەلگىسى ول — اقشانى الۋدىڭ قيىندىعى. قارجى پيراميدالارى كوبىنەسە اقشا الۋعا جاساندى كەدەرگىلەر تۋدىرادى، بۇل قاتىسۋشىلاردى جيناقتارىن جۇيەدە مۇمكىندىگىنشە ۇزاق قالدىرۋعا ءماجبۇر ەتەدى. زاڭدى ينۆەستيتسيالىق جوبالاردا قاراجات الۋ شارتتارى ادەتتە ناقتى كورسەتىلگەن جانە قاتىسۋشىلار ءۇشىن قوسىمشا قيىندىقتار تۋعىزبايدى. ەگەر ءسىز اقشاڭىزدى الۋعا تىرىسقاندا قيىندىقتارعا تاپ بولساڭىز، بۇل ءسىزدىڭ قارجىلىق پيراميدامەن كۇرەسىپ جاتقانىڭىزدىڭ بەلگىسى بولۋى مۇمكىن.
قارجى پيراميدالارى جاڭا قاتىسۋشىلاردى تارتۋ ءۇشىن الەۋمەتتىك جەلىلەر مەن مەسسەندجەرلەردى قولدانا وتىرىپ، كوبىنەسە ونلاين رەجيمىندە جۇمىس ىستەيتىنىن ۇمىتپاڭىز. ينتەرنەت ارقىلى كەلەتىن ۇسىنىستاردان ساق بولىڭىز، سونداي-اق، كومپانيا ناقتى قارجىلىق كورسەتكىشتەرگە ەمەس، بونۋستار مەن ىنتالاندىرۋلارعا نازار اۋدارسا، بۇلدا قاۋىپتەن قورعانۋ كەرەك دەگەن بەلگى.
اقىرىندا، قارجى پيراميدالارىنىڭ ءومىر ءسۇرۋ ۇزاقتىعى شەكتەۋلى ەكەنىن ۇمىتپاڭىز. ەرتە مە، كەش پە، ولار قۇلاپ، قاتىسۋشىلاردى ۇلكەن شىعىنعا ۇشىراتادى. الاياقتار بارلىق كەڭسەلەر مەن سايتتاردى جابۋ ارقىلى كەنەتتەن جوعالىپ كەتۋى نەمەسە ۋادەلەرىن ورىنداماي بانكروتتىق جاريالاۋى مۇمكىن. قارجىلىق پيراميدالاردى انىقتاۋ قىراعى بولۋدى تالاپ ەتەدى. ەگەر ءسىز اتالعان بەلگىلەردىڭ بىرەۋىن نەمەسە بىرنەشەۋىن بايقاساڭىز، اقشاڭىزدى سالماس بۇرىن جەتى رەت ولشەپ، ءبىر رەت كەسىپ، بارىپ شەشىمگە كەلگەن دۇرىس.
