قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ نەمەرە ءىنىسى قايرات ساتىبالدى مەملەكەتكە 50 ميلليارد تەڭگەدەن استام اكتيۆتى قايتارادى. بۇل تۋرالى بۇگىن، 15 تامىزدا باس پروكۋراتۋرانىڭ اكتيۆتەردى قايتارۋ جونىندەگى كوميتەتى ايتتى، دەپ حابارلايدى «ادىرنا» ءتىلشىسى.
قازىرگى تاڭدا 18 ملرد تەڭگەگە اكتيۆتەر قايتارىلدى. ولاردىڭ قاتارىندا الماتىداعى 2 ءىرى بيزنەس ورتالىعى، كوممەرتسيالىق جىلجىمايتىن مۇلىك جانە استانانىڭ بەدەلدى اۋدانىنداعى ەليتالىق ءۇي بار.
«ساتىبالدىدان ءتىنتۋ بارىسىندا الىنعان 95 مىڭ اقش دوللارى ارنايى مەملەكەتتىك قورعا اۋدارىلدى. سونىمەن قاتار جۇزدەگەن ميلليون تەڭگەگە ەكسكليۋزيۆتى زەرگەرلىك بۇيىمدار، برەندتىك ساعاتتار، كوللەكتسيالىق مونەتالار جانە باسقا دا ءساندى بۇيىمدار، بىرىككەن اراب امىرلىكتەرىنەن جالپى قۇنى 192 ملن تەڭگەنى قۇرايتىن Rolls-Royce Cullinan جانە Aston Martin ماركالى كولىكتەر تۇرىندەگى اكتيۆتەر قايتارىلدى»،—دەلىنگەن حابارلامادا.
ودان بولەك، قايرات ساتىبالدى مەن ونىڭ جاقىندارىنا تيەسىلى شەتەلدىك مۇلىكتىڭ تاپسىرىلۋى اياقتالۋ ساتىسىندا.
ولارعا دۋباي قالاسىنداعى قۇنى 20 ملرد تەڭگە تۇراتىن ەكى باعالى ۆيللا، فرانتسيانىڭ كوكشىل جاعالاۋىنداعى قۇنى 4 ملرد تەڭگە تۇراتىن ءتورت ەليتالىق پاتەر، قۇنى 5 ملرد تەڭگە تۇراتىن رەسەيدىڭ ماسكەۋ قالاسىنداعى بەدەلدى تۇرعىن ءۇي كەشەندەرىندەگى 15 جىلجىمايتىن مۇلىك، قۇنى 4 ملرد تەڭگەدەن استام تۇركيانىڭ بودرۋم جانە ىستامبۇل قالالارىنداعى ەكى ەليتالىق ۆيللا جانە پاتەر جاتادى.
ەسكە سالايىق، 2022 جىلدىڭ 26 قىركۇيەگىندە استانا قالاسى بايقوڭىر اۋدانىنىڭ №2 سوتى قايرات ساتىبالدىنى 6 جىلعا باس بوستاندىعىنان ايىرعان بولاتىن. وعان قىلمىستىق كودەكستىڭ ەكى بابى («الداۋ نەمەسە سەنىمگە قيانات جاساۋ جولىمەن مۇلىكتىك زالال كەلتىرۋ»، «سەنىپ تاپسىرىلعان بوتەن مۇلىكتى يەمدەنۋ نەمەسە تالان-تاراجعا سالۋ») باپتارى بويىنشا ايىپ تاعىلدى.
