تاراز قالاسىنىڭ دوستىق ۇيىندە تانىمال جۋرناليست ميحايل تەنىڭ جامبىل وبلىسىنىڭ 80 جىلدىعىنا ارنالعان «ساكرالنىي كازاحستان. سۆياتىني درەۆنەگو تارازا» اتتى كىتابىنىڭ تۇساۋكەسەرى ءوتتى، دەپ حابارلايدى adyrna.kz ۇلتتىق پورتالى جامبىل وبلىسى اكىمى اپپاراتى «قوعامدىق كەلىسىم» كمم باسپاسوز ورتالىعىنا سىلتەمە جاساپ.
تارازدىڭ تاريحى تۋرالى جازىلعان كىتاپتىڭ تۇساۋكەسەرىن جامبىل وبلىسى قازاقستان حالقى اسسامبلەياسى جانە وبلىس اكىمى اپپاراتى «قوعامدىق كەلىسىم» كمم ۇيىمداستىردى. تاعىلىمدى جيىندى وبلىستىق مادەنيەت باسقارماسىنىڭ وكىلى ميحايل پلاتوۆ اشىپ جۇرگىزىپ وتىردى. ميحايل پلاتوۆتىڭ ايتۋىنشا، ميحايل تيو رەسپۋبليكالىق «كازاحستانسكايا پراۆدا» گازەتىنىڭ جامبىل وبلىسى بويىنشا مەنشىكتى ءتىلشىسى رەتىندە «رۋحاني جاڭعىرۋ» جانە «ۇلى دالانىڭ جەتى قىرى» مەملەكەتتىك باعدارلامالارىن ىسكە اسىرۋعا ءوز ۇلەسىن قوسىپ جۇرگەن تانىمال تۇلعا.
– باسىلىم وبلىستىڭ مادەنيەت، تاريح جانە ارحەولوگيانىڭ ەڭ تانىمال ەسكەرتكىشتەرى تۋرالى عىلىمي-كوپشىلىك ماقالالار جيناعى بولىپ تابىلادى. تاراز تۋرالى تاماشا تۋىندى 13 تاراۋدان تۇرادى. ولاردىڭ ارقايسىسى وبلىس اۋماعىندا ورنالاسقان قاسيەتتى جەرلەرگە ارنالعان. ولاردىڭ ىشىندە بارشامىزعا بەلگىلى، قازىر جامبىل جەرىندەگى تۋريستىك تارتىمدىلىعى جوعارعى نىسانداردىڭ بۇكىلالەمدىك تىزىمىنە ەنگەن ايشا-ءبيبى، بابادجي-حاتۋن، قاراحان، تەكتۇرماس كەسەنەلەرى، ەجەلگى يسلام مەشىتى، تورتكۇل كەرۋەن-سارايى جانە ت.ب. بار. كىتاپتا تەك ميحايل تەنىڭ عانا ەمەس، ايماقتاعى ءوز ءىسىنىڭ تانىمال شەبەرلەرى يۋري كيم، اعادىل رىسماحان، التىنبەك كارتاباي جانە ۆيكتور بارباش جاساعان كوپتەگەن فوتوسۋرەتتەردى (شامامەن 100 سۋرەت) كورۋگە بولادى. اۆتوردىڭ كىتاپقا دايىنداعان يلليۋستراتسيالارى دا كەرەمەت. جيناقتىڭ مۇقاباسى ايشا ءبيبى كەسەنەسى جانە اقىرتاس قالاشىقتارىنىڭ فوتوسۋرەتتەرىمەن كوركەمدەلگەن، – دەيدى ول.
ەرەكشە فورماتتا، شىعارماشىلىق كەش تۇرىندە وتكەن تۇساۋكەسەر قوناقتاردىڭ قىزىعۋشىلىعىن تۋدىرماي قويمادى. ونىڭ ۇستىنە ميحايل پلاتوۆ كەشتىڭ جۇرگىزۋشىسى رەتىندە عانا ەمەس، سونىمەن قاتار جازۋشىنىڭ مەكتەپ كەزىندەگى قىزىقتى وقيعالارىمەن ءمان-ماعىنالى سۇحبات جۇزىندە دە ءبولىستى
ال ءتول تۋىندىنىڭ اۆتورى بۇل كىتاپتى جازامىن دەپ ويلاماعانىن ايتادى. الايدا ول دوستارىنىڭ ءوتىنىشىن جەرگە تاستاماي، تاراز تۋرالى كىتاپ جازعانىن ماقتانىششپەن جەتكىزدى.
– مەن بۇل كىتابىمدى جازام دەپ ويلاماپ ەدىم. ارىپتەستەرىم جانە دوس-جاراندارىم رەسپۋبليكالىق «قازاحستانسكايا پراۆدا» گازەتىندە جاريالانعان وڭىرلىك كيەلى جەرلەر تۋراسىنداعى ماقالالارىمدى كورىپ، «سەن نەگە وسىنىڭ ءبارىن جيناقتاپ، كىتاپ جازبايسىڭ؟» دەپ قولقالاعانى بار ەمەس پە؟! ءوزىم دە زەردەلەسەم، تاريحي ولكە تاقىرىبىندا جازعان ماتەريالدارىم مەن تۇسىرگەن سۋرەتتەرىمنىڭ سانى شىنىمەن دە 3 جىلدان بەرى بىرازعا جەتكەن ەكەن. وسى سەبەپتى دە ويلانىپ-تولعانا كەلە قولجازبالارىمدى جيناقتاپ كىتاپ ەتىپ شىعارۋدى ۇيعاردىم. مىنە، ءسويتىپ وسى اتالمىش ءتولتۋىندىم جارىق كوردى. مەنىڭ ويىمشا، اتالعان ەڭبەك وقۋشىلار مەن ستۋدەنتتەر، تاريح، ارحەولوگيا جانە ولكەتانۋ تاقىرىبىنا قىزىعۋشىلىق تانىتاتىن بارلىق ادامدار ءۇشىن دە پايدالى، – دەيدى اۆتور.
جيىندا «نۇر وتان» پارتياسى وبلىستىق فيليالى توراعاسىنىڭ ورىنباسارى ەرقانات مانجۋوۆ پەن وبلىس اكىمى اپپاراتىنىڭ "قوعامدىق كەلىسىم" كمم باسشىسىنىڭ ورىنباسارى ساۋلە قۇرمانقۇلوۆا ءسوز الىپ، ءوز ويلارىن ورتاعا سالدى. نۇرقانات نۇرباپاۇلىنىڭ ايتۋىنشا، ميحايل بوريسۇلىنىڭ ءتول تۋىندىسى جەرگىلىكتى تۇرعىنداردىڭ تۋعان ولكەسىن ارالاپ ساياحاتتاۋعا دەگەن قىزىعۋشىلىعىن وياتادى. سونداي-اق ول اتالعان كىتاپتىڭ شەتەلدىك تۋريستەر ءۇشىن دە تاماشا تۋىندى بولاتىنىنا سەنىمى مول ەكەندىگىن جەتكىزدى.
كەش اياسىندا ميحايل تە گيتارمەن ءان ايتىپ، ءوزىن جاڭا قىرىنان تانىستىردى. سونداي-اق اۆتور ءوز وقىرماندارىنىڭ ءوتىنىشىن جەرگە تاستاماي، تىرناقالدى تۋىندىسىنا قولتاڭبا جازىپ بەردى.
"ادىرنا" ۇلتتىق پورتالى
