شىمكەنتتە كۇكىرت زاۋىتى جانىپ، اۋاعا جاعىمسىز ءيىس تارادى، دەپ حابارلايدى “ادىرنا” ۇلتتىق پورتالى.
27 شىلدە كۇنى ورتەنگەن كۇكىرتتى ءسوندىرۋ ءۇشىن 300-گە جۋىق ادام، 100-دەن استام تەحنيكا، 1 ءورت ءسوندىرۋ پويىزى جۇمىلدىرىلىپ، قىزىل جالىن وقشاۋلانعان.
شىمكەنت قالاسى تجد ءورت ءسوندىرۋ بولىمشەلەرى زارداپ شەككەندەر تۋرالى اقپارات جوق ەكەنىن حابارلادى.
ءورت ورنىنا قتج-نىڭ ءورت ءسوندىرۋ پويىزى كەلىپ، جاو، سەس جانە وقكد وكىلدەرى جۇمىلدىرىلدى.
"ينەرتتى ماتەريالداردى توسەۋ جۇمىستارى جالعاسۋدا. قازىرگى ۋاقىتتا اۋە-مەحنيكالىق كوبىك بەرۋ ارقىلى اشىق ءورت وشاقتارى ءسوندىرىلدى. وقيعا ورنىندا ءورتتى ءسوندىرۋدىڭ ءۇش جاۋىنگەرلىك ۋچاسكەسى ۇيىمداستىرىلدى. وتتىڭ تارالۋ قاۋپى جوق", - دەلىنگەن تجم حابارلاماسىندا.
ودان بولەك، شاڭىراق شاعىن اۋدانىنىڭ تۇرعىندارى ەۆاكۋاتسيالانعان.
جەلىدەگى وقىرماندار شىمكەنتتىكتەردە تىنىس الۋ جولدارىنىڭ اشۋى، جوتەل، كوزدىڭ جاساۋراۋى سىندى بەلگىلەردىڭ بولىپ جاتقانىن حابارلادى. مۇنى كۇكىرت زاۋىتىنىڭ ورتەنۋى سالدارىنان اۋانىڭ لاستانۋىمەن بايلانىستىرۋدا.
شىمكەنتتىك تۇرعىن، تاريحشى ومىربەك شىنىبەكۇلى كۇكىرت زاۋىتىنىڭ ورتەنۋىنە قاتىستى:
“كۇكىرت زاۋىتىندا ءورت شىعىپ، كەشەلى-بەرى سوندىرە الماي جاتىر دەيدى. ول پالەنى تەك قۇممەن عانا ءسوندىرۋ كەرەك ەكەن، ءبىزدىڭ “پروفيلەر” سۋ شاشىپتى”، - دەپ پىكىر قالدىرعان.
