قوعامدا ءوز ىسىنە بەرىك، اقىل پاراساتى مول جاس ماماندار بارشىلىق. مەملەكەت باسشىسى قاسىم -جومارت توقاەۆ «بولاشاق جاستاردىڭ قولىندا» دەپ ۇنەمى ايتىپ، بۇگىندە جاستارعا بارىنشا مەملەكەت تاراپىنان قولداۋ كورسەتىلىپ كەلەدى. ەلىمىزدىڭ قوعامدىق ومىرىنە بەلسەندى تۇردە ارالاسىپ، ءوز ۇستانىمىنا بەرىك، ءتۇرلى يدەيالار ۇسىنىپ، ولاردى ىسكە اسىرۋعا اتسالىسىپ جۇرگەن جاستاردىڭ ەڭبەكتەرىن ۇلگى ەتۋ ماقساتىندا اقمولا وبلىسى ىشكى ساياسات باسقارماسىنىڭ «قوعامدىق دامۋ ورتالىعى» كمم «جاستار - جارقىن بولاشاققا» ايدارىن باستاعان بولاتىن.
ايدارىمىزدىڭ كەزەكتى كەيىپكەرى - اقمولا وبلىسى دەنساۋلىق ساقتاۋ باسقارماسىنىڭ انا، بالا جانە قوعامدىق دەنساۋلىق ساقتاۋ ءبولىمىنىڭ باس مامانى ايجان تولەۋحانقىزى قۇرماەۆا.
ايجان تولەۋحانقىزى 2010 جىلى كوكشەتاۋ قالاسىنىڭ № 1ورتا مەكتەبىن ۇزدىك ديپلوممەن اياقتاپ، سول جىلى قاراعاندى مەملەكەتتىك مەديتسينا ۋنيۆەرسيتەتىنە (قوعامدىق دەنساۋلىق ساقتاۋ ماماندىعى بويىنشا)وقۋعا تۇسەدى. ماگيستراتۋرانى دا اياقتاپ، ماگيسترلىك ديسسەرتاتسياسىن: قاراعاندى قالاسىندا «سالمونەللەز اۋرۋىنىڭ الەۋمەتتىك - ەپيدەميولوگيالىق ەرەكشەلىكتەرى» تاقىرىبىندا ءساتتى قورعاپ شىقتى.
كەيىپكەرىمىز ۋنيۆەرسيتەت قابىرعاسىندا ءجۇرىپ، تاربيە جۇمىسى جانە جاستار ساياساتى ءبولىمىنىڭ ۇيىرمە جەتەكشىسى بولىپ جۇمىس اتقاردى. سونىمەن قاتار، وقۋ ورنىنىڭ بارلىق قوعامدىق جۇمىستارعا بەلسەنە قاتىسىپ، كوپتەگەن سايىس – بايقاۋلاردىڭ جۇلدەگەرى اتانادى.
قوعامدىق دەنساۋلىق ساقتاۋ بويىنشا 35-تەن استام عىلىمي ماقالاردىڭ اۆتورى. سولاردىڭ ىشىندەگى ەڭ اۋقىمدىلارى سانكت-پەتەربۋرگ قالاسىنىڭ «ينفەكتولوگيا»، «سانكت-پەتەربۋرگ پەن لەنينگراد وبلىسىنىڭ جۇقپالى اۋرۋلار دارىگەرلەرىنىڭ قاۋىمداستىعى» عىلىمي جۋرنالدارىندا جارقى كوردى. جاس بولسا دا، بىلىكتى مامانىمىز مەديتسينا سالاسىنا ايتارلىقتاي ءوز ۇلەسىن قوسىپ ءجۇر.
بۇگىندە مەديتسينا سالاسىندا ايانباي ەڭبەك ەتىپ جۇرگەن ايجان تولەۋحانقىزىنا قىزمەتتە تولاعاي تابىس، ابىروي-بەدەل، وتباسىنا اماندىق تىلەيمىز! دەنساۋلىق ساقتاۋ سالاسىندا الار اسۋلارى كوپ بولسىن!
ايگۇل ۇستەمبەك،
«قوعامدىق دامۋ ورتالىعى» كمم
اقپاراتتىق – تالداۋ ءبولىمىنىڭ باسشىسى.