الماتى وبلىسىندا «جاسىل ەل» جاستار ەڭبەك جاساعىنىڭ XX ماۋسىمى اشىلدى، دەپ حابارلايدى “ادىرنا” ۇلتتىق پورتالى.
ەلىمىز بويىنشا «جاسىل ەل» باعدارلاماسى 2005 جىلدان بەرى جۇزەگە اسىپ كەلەدى. جوبا جاسوسپىرىمدەر مەن جاستار اراسىندا قورشاعان ورتانى قورعاي وتىرىپ، ەڭبەككە ارالاستىرۋ ارقىلى تابيعاتتى كۇتىپ باپتاۋعا باۋليدى.
اعىمداعى جىلى وبلىس بويىنشا «جاسىل ەل» ەڭبەك جاساعىنا 14 پەن 35 جاس ارالىعىنداعى 1000-نان اسا جاس سارباز تارتىلىپ، ماۋسىمدىق جۇمىسپەن قامتىلادى. اتالمىش جوبا الەۋمەتتىك وسال، كوپبالالى وتباسىلاردىڭ بالالارىن، NEET ساناتىنداعى جاستاردى قولداۋعا باعىتتالعان.
الداعى ەكى اي كولەمىندە جاس ساربازدار ءوڭىردى اباتتاندىرىپ، ءوز ولكەسىن كوگالداندىرىپ قانا قويماي، ءتيىستى ەڭبەكاقىسىن الىپ، ارنايى كيىمدەرمەن قامتاماسىز ەتىلەدى. وسىلايشا وبلىس جاستارى «تازا قازاقستان» جالپىۇلتتىق ەكو-ناۋقانىنىڭ اياسىنداعى جۇمىستى جالعاستىرىپ وبلىستىڭ ەكولوگياسىن جاقسارتۋعا ۇلەس قوسپاق.
شارا بارىسىندا وبلىس اكىمىنىڭ ورىنباسارى الماس باتانوۆ «جاسىل ەل» باعدارلاماسى جاستار ءۇشىن وڭىردەگى ەڭ تابىستى جانە اۋقىمدى الەۋمەتتىك جوبالاردىڭ ءبىرى ەكەنىنە توقتالىپ، ءداستۇرلى ەڭبەك ماۋسىمىنىڭ اشىلۋىمەن وبلىس اكىمىنىڭ اتىنان قۇتتىقتاۋ تىلەگىن جەتكىزىپ، الداعى جۇمىستارىنا تابىس تىلەدى.
سالتاناتتى اشىلۋ راسىمىنەن كەيىن، «جاسىل ەل» ساربازدارى جۇمىستارىنا بىردەن بىلەك سىبانا كىرىسىپ قاپشاعاي سۋ قويماسىنىڭ جاعالاۋىندا تازالىق جۇمىستارىن جۇرگىزىپ، دەمالۋشىلار اراسىندا ەكولوگيالىق مادەنيەتتى قالىپتاستىرۋ، قورشاعان ورتانى لاستاماۋ بويىنشا اقپاراتتىق تۇسىندىرمە اكتسياسىن وتكىزدى.
