"اقتوبە وبلىسىنىڭ ۆەتەريناريا باسقارماسى" جابايى يت-مىسىقتاردى اۋلاۋ ماقساتىندا "جابايى جانۋارلاردى اۋلاۋ بويىنشا قىزمەتتەر" اتتى تەندەر جاريالادى، دەپ حابارلايدى «ادىرنا» ۇلتتىق پورتالى satypalu.gov.kz سايتىنا سىلتەمە جاساپ.
تەندەرگە وتىنىمدەردى قابىلداۋ 17 شىلدە كۇنى باستالىپ، جەڭىمپاز 27 شىلدە كۇنى انىقتالادى. تەحنيكالىق سيپاتتامادا مەملەكەتتىك تاپسىرىستى جۇزەگە اسىرۋشى 2024 جىلدىڭ 31 جەلتوقسانىنا دەيىن اقتوبە قالاسىنىڭ الماتى جانە استانا اۋداندارىنان كەمىندە قاراۋسىز قالعان قاڭعىباس 8 000 يت پەن 5 000 مىسىقتى اۋلاپ، ۋاقىتشا ۇستاۋ پۋنكىنە جەتكىزۋى ءتيىس ەكەنى جازىلعان. ياعني، ءبىر قاڭعىباس ءۇي جانۋارىن ۇستاۋ شامامەن 2230 تەڭگەنى قۇرايدى.
جاڭا جىلعا دەيىن بار بولعانى بەس اي ۋاقىت قالدى. مەملەكەتتىك تاپسىرىستى ورىنداۋشىلار بار بولعانى بەس اي ىشىندە اقتوبە قالاسىنىڭ الماتى مەن استانا اتتى ەكى-اق اۋدانىنان 8 000 يت، 5 000 مىسىقتى تابۋى، ۇستاۋى مۇمكىن بە؟ اقتوبە قالاسىنىڭ ەكى-اق اۋدانىندا 13 000 باس يت-مىسىق قاڭعىپ جۇرسە، اقتوبە وبلىسىنىڭ ۆەتەريناريا باسقارماسى بۇعان دەيىن نە قاراعان؟ بەس اي ىشىندە بۇكىل اقتوبە وبلىسى اۋماعىنان 13 000 باس يت-مىسىق اۋلاۋعا بولار، ال الاقانداي ەكى اۋداننان 29 ميلليون تەڭگەگە باعالانعان تاپسىرىستى ورىنداۋ اقىلعا سىيا ما؟ بۇل سۇراقتاردى ءتيىستى مەكەمەگە جولدادىق. جاۋابىن قوسىمشا جاريالايتىن بولامىز.
اقان بىرلىك
«ادىرنا» ۇلتتىق پورتالى
