ۇكىمەت، ۇلتتىق بانك پەن ستاتي تاراپتارى نەگىزدەمەلىك كەلىسىمگە قول قويدى. بۇل تۋرالى بۇگىن، 16 شىلدەدە ادىلەت مينيسترلىگىنىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«قازاقستان رەسپۋبليكاسىنىڭ ۇكىمەتى، قازاقستان ۇلتتىق بانكى مەن Tristan Oil جەتەكشى كرەديتورلارىنىڭ قولداۋىمەن جانە كەلىسىمىمەن ستاتي تاراپتارى قازاقستانداعى مۇناي-گاز اكتيۆتەرى تۋرالى ۇزاق مەرزىمدى داۋدى بەيبىت جانە ءوزارا قولايلى رەتتەۋ تۋرالى زاڭدى كۇشى بار نەگىزدەمەلىك كەلىسىمگە قول قويدى. تاراپتار بارلىق زاڭدى تالقىلاۋلاردى توقتاتۋعا جانە بارلىق يۋريسديكتسيالارداعى اعىمداعى تالاپتاردى توقتاتۋعا اكەلەتىن ءوزارا قولايلى شارتتاردا كەلىسىمگە كەلۋگە قۋانىشتى»،—دەلىنگەن حابارلامادا.
ادىلەت ءمينيسترى ازامات ەسقاراەۆ بۇل كەلىسىمنىڭ قوعامدىق مۇددەنى ەسكەرە وتىرىپ قابىلدانعانىن جانە بيۋدجەت قاراجاتىنىڭ جۇمسالۋىن كوزدەمەيتىنىن جەتكىزدى.
ايتا كەتەيىك، Argentem Creek Partners – ستاتي تاراپتارىنىڭ ينۆەستيتسيالىق قۇرالى Tristan Oil Limited-ءتىڭ كرەديتورلارى بولىپ تابىلاتىن ناقتى قورلاردىڭ ينۆەستيتسيالىق باسقارۋشىسى.
2010 جىلى مولدوۆالىق بيزنەسمەندەر اناتول جانە گابريەل ستاتي «قازاقستان رەيدەرلىك جولمەن مۇلكىمىزدى تارتىپ الدى» دەگەن مالىمدەمە جاساپ، 4 ميلليارد دوللار تالاپ ەتكەن ەدى. قازاقستان بۇل ايىپتاردى جوققا شىعاردى. 2013 جىلدىڭ جەلتوقسانىندا حالىقارالىق اربيتراجدىق سوت اناتول ستاتي باستاعان شاعىمدانۋشىلار توبىنىڭ پايداسىنا شەشىم شىعارىپ، قازاقستاندى 506 ملن دوللار وتەماقى تولەۋگە مىندەتتەدى. 2017 جىلدىڭ جەلتوقسانىندا Bank of New York Mellon كاستوديان-بانكى قازاقستان ۇلتتىق قورىنىڭ 22 ميلليارد دوللار كولەمىندەگى اكتيۆتەرىن بۇعاتتادى.
2022 جىلدىڭ ماۋسىمىندا گوللانديا سوتى ستاتي ءىسى بويىنشا KMG Kashagan B.V. 5,2 ملرد دوللارعا تەڭ اكتسيالارىنا تىيىم سالۋدى الىپ تاستاۋ تۋرالى شەشىم شىعاردى.
2023 جىلدىڭ 8 اقپانىندا امستەردام اۋداندىق سوتى كاسىپكەرلەر اناتولي مەن گابريەل ءستاتيدىڭ جانە ولاردىڭ كومپانيالارىنىڭ «سامۇرىق-قازىناعا» قارسى شاعىمدارى نەگىزسىز دەپ شەشتى. سوت ستاتيگە «سامۇرىق-قازىنا» مەن قازاقستان رەسپۋبليكاسى شەككەن سوت شىعىنىن تولەۋگە مىندەتتەدى.
