AQSh prezıdenti Djo Baıden prezıdenttikke kandıdat Donald Tramptqa jasalǵan qastandyq áreketine baılanysty Amerıka halqyna úndeý jasady. Ol amerıkalyqtardy saıasattaǵy zorlyq-zombylyqtan bas tartýǵa shaqyrdy. Bul týraly VVS jarııalady, dep habarlaıdy ”Adyrna” ulttyq portaly.
«Biz saıasatymyzda temperatýrany tómendetýimiz kerek. Mundaı zorlyq-zombylyqtyń normaǵa aınalýyna jol berilmeýi tıis. Elimizdegi saıası rıtorıka óte qyza tústi. Ony salqyndatatyn ýaqyt keldi. Muny isteý – bárimizdiń jaýapkershiligimiz», - dedi Baıden.
Sondaı-aq, ol saıasat «beıbit pikirtalas alańy» bolýy kerek ekenin jáne zorlyq-zombylyq eshqashan jaýap bola almaıtynyn aıtty. Prezıdent Trampqa tezirek saýyǵyp ketýin tilep, mıtıngi kezinde onyń otbasy múshelerin oqtan qorǵaǵan 50 jastaǵy Korı Komperatoreni batyr dep atady.
Aıta ketsek, bul - Baıdenniń prezıdenttik kezeńdegi Sopaqsha kabınetten jasaǵan úshinshi úndeýi. Mundaı sóz sóıleý salystyrmaly túrde sırek ótip, ádette eń mańyzdy oqıǵalarǵa arnalady. Baıden buǵan deıingi úndeýin ótken jyldyń qazan aıynda HAMAS-tyń Izraılge shabýylynan keıin jasaǵan.
Buǵan deıin ol 2023 jyldyń maýsymynda AQSh Kongresinen amerıkalyq qaryz shegin ulǵaıtýǵa ruqsat berýdi talap etý úshin ultqa úndeý jasady.
Eske salsaq, buǵan deıin AQSh-tyń Pensılvanııa shtatynda saılaýaldy akııasy kezinde Donald Trampqa qastandyq jasalǵan bolatyn.
Senbi kúni burynǵy prezıdent Donald Trampty óltirmek bolǵan adamnyń 20 jastaǵy Tomas Mettıý Krýks ekeni anyqtaldy.
Qazaqstan Prezıdenti Qasym-Jomart Toqaev AQSh saıasatkeri Donald Trampqa jasalǵan qastandyqty qatań aıyptaıtynyn málimdedi.
