ءماجىلىس دەپۋتاتى ەرمۇرات باپي دارىگەرلەردىڭ سىرقاتىنا ناقتى دياگنوز قويا الماعانىن ايتتى، دەپ حابارلايدى «ادىرنا» ءتىلشىسى.
«بىردەن ايتايىن، مەن ازىرگە قازاقستاننان ەشقايدا كەتكەن جوقپىن. ەلدەمىن. دەنساۋلىعىم دا سونشالىقتى قاتەرلى جاعدايدا دەپ ويلامايمىن. بىراق اياق استىنان پايدا بولعان بەلگىسىز دەرتكە بايلانىستى ناۋرىز-ءساۋىر ايلارىندا پرەزيدەنتتىڭ ءىس باسقارماسىنا قاراستى كلينيكادا جاتىپ، تولىق كەشەندى تەكسەرۋدەن ءوتتىم. قان مەن دارەتتەن باستاپ، بۇيرەك، باۋىر، اسقازان، ءىش قۇرىلىس، پارازيتتىك جانە توكسيكولوگيالىق اناليزدى قوسىپ، بيوپسياعا دەيىن تاپسىردىم. دارىگەرلىك كونتسيليۋم ەشقانداي دەرتتىڭ دەرەگىن تاپپادى.
ءدال سول كلينيكادا جاتقان كەزىمدە دەنەمنىڭ ءار جەرىندە تاعى دا ىسىكتەر پايدا بولدى. كونسيليۋمعا قاتىسۋشى دارىگەرلەر ول ىسىكتەردى قولمەن ۇستاپ، ءوز كوزدەرىمەن كوردى. بىراق ەشقانداي دياگنوز قويا المادى. بارلىق اناليزدەردى تەكسەرىپ، اللەرگيا ەمەس ەكەنىن ءتۇسىندىردى»،—دەدى ول.
دەپۋتاتقا ماماندار «40 جىل دارىگەرلىك تاجىريبەلەرىندە مۇنداي جاعدايمەن ءبىرىنشى رەت كەزدەسكەندەرىن» جەتكىزگەن.
«ءارتۇرلى مەديادا سان ساققا الىپقاشپا جاريالانىمدارعا قاتىستى ايتار بولسام، بۇل اقپارات قاسكۇنەمدەر قولىنان ۋكراينادا قازا تاپقان تانىمال جورنالشى ايدوس سادىقوۆتىڭ الماتىدا وتكەن اسىنان كەيىن ءورشىپ كەتتى. بۇل اسقا مەن دە قاتىسۋىم كەرەك ەدى.
بىراق ءدال سول ريتۋالدان ءبىر كۇن بۇرىن سىرقاتىم قايتادان قوزدى. استاعى قۇرانعا قول جايۋعا جينالعان بىرنەشە قوعامشىل ازاماتتار: "قايداسىز، كۇتىپ وتىرمىز..." دەپ مەنى ىزدەپ، قوڭىراۋ شالدى. مەن ولاردىڭ ارقايسىسىنا اۋىرىپ قالعانىمدى، اسقا قاتىسا المايتىنىمدى ايتتىم.
راسىندا دا، سوڭعى ءتورت ايدان بەرگى ادەتتە، بۇل ىسىك شىعا باستاعان كەزدە ادام ايتقىسىز قىشۋ پايدا بولادى. ارقاڭدى ەسىكتىڭ، قولىڭدى ۇستەلدىڭ قىرىنا قاسىساڭ دا تىنشۋ تابۋ وڭاي ەمەس. دۋىلداپ قىشىعان كەزدە، دەنەڭنىڭ قىشىعان جەرىن كەسىپ الىپ تاستاعىڭ كەلەدى. ارتىنشا سول قىشىعان جەرىڭ كۇرت ىسىنە باستايدى دا، دەنە قىزۋىڭ كوتەرىلەدى. ىسىكتەن بىلەزىگىڭە - ساعاتتىڭ باۋى، ىشقىرىڭا - بەلدىگىڭ، اياعىڭا اياق كيىمىڭ شاق كەلمەي قالادى. بىراق وسى جاعداياتتى ماعان تەلەفون سوققان، الەۋمەتتىك جەلى ارقىلى مەنى ىزدەگەن قوعامشىل ازاماتتاردىڭ قايسى بىرىنە تۇسىندىرەرسىڭ؟ ءتىپتى، كەيبىرى مەنىڭ "سىلتاۋىما" سەنىمسىزدىك بىلدىرگەن سوڭ، ءىسىپ كەتكەن قولىمنىڭ سۋرەتىن جەلىگە جۇكتەپ، جالپىعا جاۋاپ رەتىندە ارنايى پوست جاريالادىم»،—دەپ تۇسىندىردە دەپۋتات.
ەرمۇرات ءباپي كلەتكالىق-موللەكۋليارلىق دياگنوزدان ءوتۋ ءۇشىن بىرەر شەتەلدىك كلينيكاعا دارىگەرلىك اناليزدەرىن جىبەرگەنىن مالىمدەدى.
«اكەجان قاجىگەلدين اعام مەن وپپوزيتسيانىڭ شەتەلدىك بيۋروسىنداعى جىگىتتەر گەرمانيادا جۇمىستانىپ جاتىر. قازىر العاشقى كەلگەن شاقىرتۋعا وراي ەۋروپانىڭ ءبىر ەلىنە بارۋ قامىن جاساۋدامىن. شىلدەنىڭ 20-سىنان كەيىن جولعا شىعامىن. ال اتىشۋلى "نوۆيچوكقا" قاتىستى بولجام Orda.kz پورتالىنا پىكىر بىلدىرگەن سپيكەرلەردەن تاراعان ءسوز، مەنىڭ بۇعان ەشقانداي قاتىسىم جوق. سەبەبى، ۋلانۋ نەمەسە ۋلاۋ دەرەگىنە بايلانىستى مەنىڭ قولىمدا ەشقانداي دايەك جوق.
داقپىرت پەن دابىرا، حايپ پەن قاڭقۋعا قيقۋ قوسۋ ماعان قاجەت ەمەس. ەل ىشىنە بەلگىلى بولعان "ەرمۇرات باپي" دەگەن اتى-ءجونىم مەن ازدى-كوپتى ابىروي اتاعىم ماعان جەتكىلىكتى. مەن، بىرىنشىدەن، حايپ قۋاتىن جاستان اسىپ كەتكەن اداممىن. ەكىنشىدەن، ماعان داڭعازا ەمەس، دەنساۋلىق قاجەت»،—دەپ تۇيىندەدى ول.
