Mäjılıs deputaty Ermūrat Bapi därıgerlerdıŋ syrqatyna naqty diagnoz qoia almaǧanyn aitty, dep habarlaidy «Adyrna» tılşısı.
«Bırden aitaiyn, men äzırge Qazaqstannan eşqaida ketken joqpyn. Eldemın. Densaulyǧym da sonşalyqty qaterlı jaǧdaida dep oilamaimyn. Bıraq aiaq astynan paida bolǧan belgısız dertke bailanysty nauryz-säuır ailarynda Prezidenttıŋ ıs basqarmasyna qarasty klinikada jatyp, tolyq keşendı tekseruden öttım. Qan men däretten bastap, büirek, bauyr, asqazan, ış qūrylys, parazittık jäne toksikologiialyq analizdy qosyp, biopsiiaǧa deiın tapsyrdym. Därıgerlık konsilium eşqandai derttıŋ deregın tappady.
Däl sol klinikada jatqan kezımde denemnıŋ är jerınde taǧy da ısıkter paida boldy. Konsiliumǧa qatysuşy därıgerler ol ısıkterdı qolmen ūstap, öz közderımen kördı. Bıraq eşqandai diagnoz qoia almady. Barlyq analizderdı tekserıp, allergiia emes ekenın tüsındırdı»,—dedı ol.
Deputatqa mamandar «40 jyl därıgerlık täjıribelerınde mūndai jaǧdaimen bırınşı ret kezdeskenderın» jetkızgen.
«Ärtürlı mediada san saqqa alypqaşpa jariialanymdarǧa qatysty aitar bolsam, būl aqparat qaskünemder qolynan Ukrainada qaza tapqan tanymal jornalşy Aidos Sadyqovtyŋ Almatyda ötken asynan keiın örşıp kettı. Būl asqa men de qatysuym kerek edı.
Bıraq däl sol ritualdan bır kün būryn syrqatym qaitadan qozdy. Astaǧy qūranǧa qol jaiuǧa jinalǧan bırneşe qoǧamşyl azamattar: "Qaidasyz, kütıp otyrmyz..." dep menı ızdep, qoŋyrau şaldy. Men olardyŋ ärqaisysyna auyryp qalǧanymdy, asqa qatysa almaitynymdy aittym.
Rasynda da, soŋǧy tört aidan bergı ädette, būl ısık şyǧa bastaǧan kezde adam aitqysyz qyşu paida bolady. Arqaŋdy esıktıŋ, qolyŋdy üsteldıŋ qyryna qasysaŋ da tynşu tabu oŋai emes. Duyldap qyşyǧan kezde, deneŋnıŋ qyşyǧan jerın kesıp alyp tastaǧyŋ keledı. Artynşa sol qyşyǧan jerıŋ kürt ısıne bastaidy da, dene qyzuyŋ köterıledı. Isıkten bılezıgıŋe - saǧattyŋ bauy, yşqyryŋa - beldıgıŋ, aiaǧyŋa aiaq kiımıŋ şaq kelmei qalady. Bıraq osy jaǧdaiatty maǧan telefon soqqan, äleumettık jelı arqyly menı ızdegen qoǧamşyl azamattardyŋ qaisy bırıne tüsındırersıŋ? Tıptı, keibırı menıŋ "syltauyma" senımsızdık bıldırgen soŋ, ısıp ketken qolymnyŋ suretın jelıge jüktep, jalpyǧa jauap retınde arnaiy post jariialadym»,—dep tüsındırde deputat.
Ermūrat Bäpi kletkalyq-mollekuliarlyq diagnozdan ötu üşın bırer şeteldık klinikaǧa därıgerlık analizderın jıbergenın mälımdedı.
«Äkejan Qajygeldin aǧam men Oppozisiianyŋ şeteldık biurosyndaǧy jıgıtter Germaniiada jūmystanyp jatyr. Qazır alǧaşqy kelgen şaqyrtuǧa orai Europanyŋ bır elıne baru qamyn jasaudamyn. Şıldenıŋ 20-synan keiın jolǧa şyǧamyn. Al atyşuly "Novichokqa" qatysty boljam Orda.kz portalyna pıkır bıldırgen spikerlerden taraǧan söz, menıŋ būǧan eşqandai qatysym joq. Sebebı, ulanu nemese ulau deregıne bailanysty menıŋ qolymda eşqandai däiek joq.
Daqpyrt pen dabyra, haip pen qaŋquǧa qiqu qosu maǧan qajet emes. El ışıne belgılı bolǧan "Ermūrat Bapi" degen aty-jönım men azdy-köptı abyroi ataǧym maǧan jetkılıktı. Men, bırınşıden, haip quatyn jastan asyp ketken adammyn. Ekınşıden, maǧan daŋǧaza emes, densaulyq qajet»,—dep tüiındedı ol.
