قازاقستان مەن قىتاي باسشىلارى ترانسكاسپي حالىقارالىق كولىك باعىتى بويىنشا جۇك كولىكتەرى مەن تەمىرجول كونتەينەرلەرىن جونەلتۋ راسىمىنە تەلەكوپىر رەجيمىندە قاتىستى.
ءىس-شارا قاتىسۋشىلارىنا ۇلى جىبەك جولى باعىتىمەن جۇرەتىن ترانزيتتىك رەيس تۋرالى بەينەروليك كورسەتىلدى. شارا سوڭىندا پرەزيدەنت قاسىم-جومارت توقاەۆ پەن توراعا سي تسزينپين جۇك پارومدارىنىڭ قوزعالىسىن ىسكە قوستى.
سودان كەيىن ەكى ەل باسشىلارى قازاقستاننىڭ بەيجىڭدەگى جانە قىتايدىڭ استاناداعى مادەني ورتالىقتارىن سالتاناتتى تۇردە اشتى.
بۇل ورتالىقتار ەكى مەملەكەتتىڭ گۋمانيتارلىق ىنتىماقتاستىعىن دامىتۋدىڭ جاڭا كەزەڭىنە جول اشادى. سونداي-اق دوستاس ەكى ەل حالىقتارى اراسىنداعى ءوزارا تۇسىنىستىكتى نىعايتۋعا باعىتتالعان ءتۇرلى مادەني شارالار، كورمەلەر، دارىستەر مەن شەبەرلىك ساباقتارىن وتكىزۋگە ارنالعان الاڭعا اينالادى.
سونىمەن قاتار قاسىم-جومارت توقاەۆ پەن سي تسزينپين استانا حالىقارالىق ۋنيۆەرسيتەتىنىڭ بازاسىندا بەيجىڭ ءتىل جانە مادەنيەت ۋنيۆەرسيتەتىنىڭ فيليالىن اشتى. مۇنى ايتۋلى وقيعا دەۋگە بولادى. قازاقستان مەن قىتاي جوعارى وقۋ ورىندارىنىڭ ىنتىماقتاستىعى ستۋدەنتتەردىڭ تەرەڭ ءبىلىم الۋىنا جانە كاسىبي تۇرعىدا وسۋىنە زور مۇمكىندىك بەرەدى جانە ولاردىڭ تىلدىك داعدىلاردى، مادەنيەتارالىق كوممۋنيكاتسيانى جانە عىلىمي زەرتتەۋ ادىستەرىن مەڭگەرۋىنە ىقپال ەتەدى.
بۇل جوبالاردىڭ تابىستى جۇزەگە اسىرىلۋى مادەنيەت جانە ءبىلىم سالالارىنداعى ءوزارا الماسۋلاردى جانداندىرۋ، ەكى ەل اراسىنداعى ساياسي جانە ەكونوميكالىق قاتىناستاردى دامىتۋ جولىنداعى ماڭىزدى قادام بولماق.
