اقمولا وبلىسى ءبىلىم باسقارماسىنىڭ مالىمەتىنشە، تۋريزم، دەنە شىنىقتىرۋ، العاشقى اسكەري جانە تەحنولوگيالىق دايىندىق ورتالىعى 2024 جىلعى 26-28 ماۋسىم ارالىعىندا ساندىقتاۋ اۋدانى بالكاشين اۋىلىنىڭ «قاناعات» قوناق ءۇي تۋريستىك كەشەنىنىڭ بازاسىندا «سىرلى ساندىقتاۋ» دالالىق ەكسپەديتسياسىن وتكىزدى.
ءىس-شارانىڭ نەگىزگى ماقساتى: وقۋشىلاردى دالا جاعدايىنا بەيىمدەلۋگە ۇيرەتۋ، ەكولوگيا مەن ولكەتانۋدى زەرتتەۋگە باۋلۋ، تۋريستىك داعدىلاردى دامىتۋ، تۋعان ولكەنىڭ تابيعاتىنا ۇقىپتى قاراۋعا تاربيەلەۋ.
دالالىق ەكسپەديتسياسىنا اتباسار، زەرەندى، ساندىقتاۋ، بۋراباي، تسەلينوگراد اۋداندارى مەن كوكشەتاۋ قالاسىنان 40 وقۋشى قاتىستى.
ەكسپەديتسيا بارىسىندا كوكشەتاۋ قالاسىنىڭ س.ءجۇنىسوۆ اتىنداعى №18 مەكتەپ - ليتسەيىنىڭ گەوگرافيا ءپانى مۇعالىمى مۇرات كاريمجانوۆ «Vernier» قۇرالدارىنىڭ كومەگىمەن سۋدىڭ جانە توپىراقتىڭ ساپاسىن قالاي بىلۋگە بولاتىنىن كورسەتتى. ەكسپەديتسيا قاتىسۋشىلارى «قاناعات» قوناق ءۇي تۋريستىك كەشەنىنىڭ اۋماعىنىڭ توپىراق ساپاسىنا زەرتتەۋ جۇرگىزدى. زەرتتەۋ توپىراقتىڭ ىلعالدىلىعى، قىشقىلدىعى، ەلەكتروتكىزگىشتىگى ت.ب. قاسيەتتەرىن قامتىدى.
تسەلينوگراد اۋدانى قاجىمۇقان اۋىلىنىڭ جالپى ءبىلىم بەرەتىن مەكتەبىنىڭ بيولوگيا جانە گەوگرافيا پاندەرىنىڭ مۇعالىمى ورىنبەكوۆا ليازات وسىمدىك گورموندارى جانە اۋكسيندى قولدانىپ وسىمدىكتەردىڭ وسۋىنە زەرتتەۋ جۇمىستارىن جۇرگىزدى. بالالار وزدەرى وسىمدىكتىڭ تۇقىمىن اۋكسينمەن جانە اۋكسينسىز پاكەتتەرگە سالىپ قويدى. بىرنەشە كۇننەن كەيىن زەرتتەۋ ناتيجەسىن كورەتتى.
كوكشەتاۋ قالاسى جوعارى تەحنيكالىق كوللەدجىنىڭ ادىسكەرى، ارنايى پاندەر وقىتۋشىسى نارباەۆا رايحان وقۋشىلارمەن ەگىندىك القاپتارىنداعى توپىراق بۇرعىسىنىڭ كومەگىمەن توپىراقتىڭ تىعىزدىعى مەن ىلعالدىلىعىن انىقتاۋ بويىنشا ءىس-شارالار جۇرگىزدى، ەگىندىكتىڭ ارامشوپتەرمەن زالالدانۋىن انىقتاپ، بارلىق جاعدايعا تالداۋ جۇمىسى جاسالدى.
«وقۋشىلار ساندىقتاۋ اۋدانىنىڭ فلوراسىن، فاۋناسىن قىزىعۋشىلىقپەن زەرتتەپ، ەكسپەديتسيا ناتيجەسىن راسىمدەدى. سونىمەن قاتار ولار باقىلاۋ كۇندەلىگىن جۇرگىزدى، گەرباريلەرى جاسادى، جورىقتاردىڭ سيپاتتامالارى مەن كارتالارىن جاسادى»،- دەپ ايتتى كوللەدج وقىتۋشىسى.
سونىمەن قاتار، دالالىق ەكسپەديتسياسىنىڭ قاتىسۋشىلارى ءۇشىن «ەكولوگيالىق كۆەست» وتكىزىلدى. ءار كوماندا 5 ستانتسيادان ءوتىپ، ءار دەڭگەيدەگى تاپسىرمالاردى مارشرۋتتىق پاراقتار ارقىلى ورىندادى.
قورىتىندىسى بويىنشا بارلىق قاتىسۋشىلارعا سەرتيفيكات، ال جەتەكشىلەرىنە اقمولا وبلىسى ءبىلىم باسقارماسىنىڭ العىس حاتى تابىس ەتىلدى.
