گرەكيادا وتشاشۋدان سوڭ ورماندى ورتەگەندەردىڭ اراسىندا باي قازاقستاندىق شەنەۋنىكتەردىڭ بولعانى انىقتالدى، دەپ حابارلايدى "ادىرنا" ۇلتتىق پورتالى ازاتتىق رۋحىنا سىلتەپ.
ورمان ءورتى كەزىندە كۇدىكتى بولعان وليگارحتىڭ ءبىرى - Forbes تىزىمىندە قازاقستانداعى ەڭ باي ەلۋلىكتىڭ ىشىندە 21 ورىندا تۇرعان دانيار ابىلعازين.
سىبايلاس جەمقورلىق پەن ۇيىمداسقان قىلمىستى زەرتتەۋ ورتالىعىنىڭ مالىمەتىنشە، «پەرسەفوني I» ياحتاسىنىڭ ىشىندە 7 قازاق بولعان ەكەن. ياحتا قوناقتارىنىڭ اراسىندا وليگارح دانيار ابىلعازين، حالىق بانكتىڭ باس ديرەكتورى ءۇمىت شاياحمەتوۆا، ونىڭ كۇيەۋى KMG International NV ۇلتتىق مۇناي كومپانياسىنىڭ بۇرىنعى توپ-مەنەدجەرى بەيىمبەت شاياحمەتوۆ جانە ولاردىڭ قىزى بولعان.
شەتەلدىك باق بەتتەرىندە گرەك ارالى ورتەنگەن كۇننەن كەيىن بيزنەسمەننىڭ جەكە ۇشاعى افينا اۋەجايىنان الماتىعا ۇشىپ كەتكەنى ايتىلۋدا. سوت قۇجاتتارى كورسەتكەندەي، بورتتا ابىلعازيننىڭ ۇلى مەن ايەلى ايدان سۇلەيمەنوۆا جانە تاعى باسقا دا لاۋازىمدى ادامدار دا بولعان.
22 ماۋسىمدا گيدرا ارالىنداعى ورمان ءورتى 300 مىڭ شارشى مەتر جەردى شارپىعان. گرەكيانىڭ ۇلتتىق ءورت ءسوندىرۋ قىزمەتى وقيعا ورنىندا 13 گرەكتى ۇستاعانى دا حابارلاندى.
