بۇگىن، 24 ماۋسىم كورەيانىڭ سەۋل قالاسىنىڭ وڭتۇستىگىندەگى حۆاسون قالاسىنداعى ليتي اككۋمۋلياتور زاۋىتىندا ءورت بولعان. سالدارىنان 22 ادام، ونىڭ ىشىندە 20 شەتەلدىك ازامات قازا تاپتى. بۇل تۋرالى Yonhap اگەنتتىگى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، ءبىر ادام ءىز-ءتۇزسىز جوعالعاندىقتان، قازا تاپقاندار سانى ارتۋى مۇمكىن.
ساعات 18:30-داعى جاعداي بويىنشا 22 جۇمىسشى قازا تاپقان، ەكەۋى اۋىر جاراقات الدى، تاعى التاۋى جەڭىل جاراقاتتانعان.
قازا تاپقان 20 شەتەلدىكتىڭ ىشىندە 18 قىتاي ازاماتى، ءبىر لاوس ازاماتى جانە تاعى ءبىر ادامنىڭ ازاماتىعى بەلگىسىز.
"سىرتقى ىستەر مينيسترلىگى زارداپ شەككەندەر مەن ولاردىڭ وتباسىلارىنا قولداۋ كورسەتۋ ءۇشىن وڭتۇستىك كورەياداعى ءتيىستى ەلدەردىڭ ديپلوماتيالىق وكىلدىكتەرىمەن تىعىز جۇمىس ىستەۋدى جوسپارلاپ وتىر", - دەدى مينيسترلىك وكىلى.
ءورت سەۋلدەن وڭتۇستىككە قاراي 45 شاقىرىم جەردە، ساعات 10:30 شاماسىندا حۆاسونداعى ليتي باتارەيالارىن شىعاراتىن Aricell كومپانياسىنىڭ زاۋىتىندا شىققان. ورتسوندىرۋشىلەر نەگىزگى ءورت ساعات 15:10 شاماسىندا باقىلاۋعا الىنعاننان كەيىن جوعالعان ادامدى ىزدەۋ ءۇشىن عيماراتتىڭ ىشىنە كىرگەن.
قازا بولعانداردىڭ بارلىعى №3 زاۋىت عيماراتىنىڭ ەكىنشى قاباتىنان تابىلدى.
