كۇن سايىن ۇكىمەتتىڭ ەنگىزىپ جاتقان جاڭا ءبىر زاڭىنا قارىق بولىپ جاتىرمىز. سولاردىڭ ءبىرى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە زەينەتاقى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" 2015 جىلعى 2 تامىزداعى قازاقستان رەسپۋبليكاسىنىڭ زاڭى. وزگەرىس بولعاندا ءجاي وزگەرىس ەمەس. سۇمدىق وزگەرىس. قازاقستان رەسپۋبليكاسىنىڭ زاڭى بويىنشا قىزمەتكەردىڭ جەكە زەينەتاقى شوتىنا اي سايىن جالاقىنىڭ 15 پايىزى اۋدارىلىپ وتىرادى. ياعني 10 پايىزى - قىزمەتكەردىڭ مىندەتتى زەينەتاقى جارنالارى، 5 پايىزى - جۇمىس بەرۋشىنىڭ ءوز قاراجاتى ەسەبىنەن زەينەتاقى جارنالارى.
مينيسترلىكتىڭ مالىمەتىنشە، بۇل جاڭاشىلدىق بارلىق جۇمىس ىستەيتىن ازاماتقا، ونىڭ ىشىندە جەكە كاسىپكەرلەر جانە جەكە پراكتيكامەن اينالىساتىن ادامدارعا قولدانىلادى. جۇمىس بەرۋشىلەردەن كەلىپ تۇسكەن زەينەتاقى جارنالارى جەكە تۇلعالاردىڭ مەنشىگى بولىپ سانالمايدى جانە مۇراعا قالدىرىلمايدى. بۇل قاراجات بجزق اكتيۆىندە بولادى جانە زەينەتكەرلەر اراسىندا قايتا بولىنەدى.
ال بۇل جونىندە ەكونوميست داۋلەت تولەۋتايۇلى: "كەلەسى جىلدان (2020 جىل، 1 قاڭتار) باستاپ زەينەتاقى قورىنا 15% پايىز ۇستالىنادى! 10+5(جۇمىس بەرۋشى). وسىلايشا، ەنپف-قا اي سايىن 35 ملرد تەڭگە ءتۇسىپ تۇرادى. سول 5%-دان تۇسكەن اقشا مۇرا رەتىندە قالمايدى. ياعني، ءولىپ كەتكەن جاعدايدا ول اقشا وزگەنىڭ پەنسياسىن تولەۋگە كەتەدى. اينالىپ كەلگەندە قاراپايىم حالىقتىڭ جيناعان اقشاسى، جىلى كرەسلودا وتىرىپ پەنسياعا كەتكەن، ۇزاق ءومىر سۇرەتىندەردى اسىرايدى " دەسە ەڭبەك جانە الەۋمەتتىك قورعاۋ ءمينيسترىنىڭ ءباسپاسوز حاتشىسى: قازاقستاندا ورتاشا ايلىق 172000 تەڭگە دەپ الىپ، سول ادام 33 جىل ەڭبەك ەتسە، 10% جۇيەمەن پەنسياعا شىققاندا (63 جاستا) 140 مىڭ تەڭگە الادى. ال 15% بولسا، پەنسياعا شىققاندا 190.000 الادى دەپ حالىقتى جۇباتۋدا.
الايدا زەينەتكە شىعۋ جاسىن بىلاي قويعاندا، ەرتەڭگى كۇندى بولجاي الماي وتىرعان بىزگە بۇل جاڭالىق كوكتەن تۇسكەندەي بولدى. قىسقاسى، كەنەتتەن ءولىم قۇشىپ جاتىپ، ارتىڭىزداعى ۇرپاققا ءبىر تيىنىڭىز قالماسا، وكىنبەڭىز! ۇزاق ءومىر سۇرمەگەن ءوزىڭىز كىنالىسىز...
اقگۇل ايداربەكوۆا
"ادىرنا" ۇلتتىق پورتالى
