تەلەجۇرگىزۋشى دانا نۇرجىگىت الەۋمەتتىك جەلىدەگى پاراقشاسىندا تۇرمىستىق زورلىق-زومبىلىققا تاپ بولعانىن ايتتى، دەپ حابارلايدى "ادىرنا" ۇلتتىق پورتالى.
بىرنەشە رەت تۇرمىستا بولعان تەلەجۇرگىزۋشى زورلىققا ۇشىراعان كەزىندە جۇمىس ىستەۋگە شاماسى دا كەلمەگەنىن اشىپ جازدى.
«ايەلدەرگە قارسى زورلىق-زومبىلىق تاقىرىبى مەنىڭ جەكە باسىمدى دا اينالىپ وتپەدى. جابىرلەنۋشىنىڭ ورنىندا بولىپ، سوت زالىندا تۇرامىن دەگەندى كىم بىلگەن؟ قيىندىق كىمدە جوق؟ مەن دە مويىماي، «باستىسى دەنساۋلىعىم مەن كاسىبىمنەن ايىرماسىن» دەۋشى ەدىم. الايدا مورالدىق-پسيحولوگيالىق قىسىم الدىمەن دەنساۋلىعىما كەسىرىن تيگىزدى، سودان سوڭ تۆ ەفيردە جۇمىس ىستەي المايتىن جاعدايعا جەتكىزدى. باسشىعا ءوزىم بارىپ، جۇمىستان كەتەمىن دەپ شەشتىم سول كەزدە. ويتكەنى تۇسكە دەيىن تەرگەۋشىنىڭ الدىندا، تۇستەن كەيىن كامەراعا، تىكەلەي ەفيردە جۇمىس ىستەۋگە جاراماي قالدىم»، - دەپ جازدى ول.
ونىڭ ەكىنشى نەكەسى ءساتسىز اياقتالىپ، سوتقا دەيىن جۇگىنگەنىن ايتادى.
«ەكىنشى نەكەم بايانسىز بولىپ، توعىسپايتىن جەردەن م.ءا. ەسىمدى ازاماتپەن مامىلەگە كەلىپ، ادامشا ەكى جاققا كەتۋدىڭ ورنىنا، ءىس ناسىرعا شاۋىپ، جابىق ەسىك جاعدايىنداعى سوت پروتسەسىنە دەيىن جەتتى. ەكى جارىم جىل بۇرىن زاڭدى تۇردە اجىراسقان ەدىك. سودان سوڭ 10 ايعا جۋىق مەنىڭ تالابىم بويىنشا ونىڭ ۇستىنەن قوزعالعان قىلمىستىق ءىستىڭ تەرگەۋ پروتسەسىنەن ءوتتىم. سوڭعى نۇكتەسى 28 مامىردا قويىلدى. ۇكىم 13 ماۋسىم كۇنى كۇشىنە ەندى. ءىستىڭ ءمان-جايىن اشپاۋعا پروتسەسكە قاتىسقاندار قولحات بەردىك. سوندىقتان ارتىق سۇراق قويماڭىزدار»، - دەدى ول.
تەلەجۇرگىزۋشىگە قيىن ساتتەن شىعۋعا بالاسىنىڭ اكەسى، بۇرىنعى كۇيەۋىنىڭ دە قولداۋ كورسەتكەنىن اتاپ ءوتتى.
«ءيا، مەن زاڭدى تۇردە قورعانۋعا ءماجبۇر بولدىم. باسىندا ءبارىمىز پەندەمىز عوي، ءبىر شەشىمگە كەلەرمىز دەپ جەڭىل كورىنگەن ءىستىڭ ارتى وسىنشاما ۋاقىتىمدى، دەنساۋلىعىمدى الادى دەپ ويلامادىم. جۇمىستىڭ، ءۇيدىڭ، بالامنىڭ بەرەكەسى قاشتى. قارجىلىق شىعىن، جۇيكەنىڭ توزعانىن ايتپاعاندا... بۇل وقيعا مەن ءۇشىن ۇلكەن سىناق تا، ساباق تا بولدى. وسى جاسقا كەلىپ، وپاسىزدىقپەن ءدال وسىلاي بەتپە-بەت كەلىپ كورمەپپىن. قازىلعان ورعا قۇلاپ جاتقانىمدا قول ۇشىن سوزعان دوستارىمنىڭ قادىرىنە جەتپەي كەلگەن ەكەنمىن دەپ وعان وكىندىم. ءبارى سول كۇندەرى قاسىمنان تابىلدى. اياۋلى انامنىڭ دۇعاسى، اكەمنىڭ كوزى بولعان قارىنداسى ءزابيدا تاتەمنىڭ، ءىنى-ءسىڭلىمنىڭ قولداۋى سۇرىنگەندە سۇيەۋ بولدى ماعان. ءتىپتى مارقۇم ۆلاديمير – ءالىمنىڭ اكەسى، بىلتىر جازدا حات جازىپ، «ساق بول» دەپ ماعان قورعان بولۋعا تىرىستى، جارىقتىق...»، - دەپ جازدى دانا نۇرجىگىت.
وقيعا وزىنە ساباق بولعانىن جەتكىزگەن دانا نۇرجىگىت زاڭعا جۇگىنۋگە شاقىردى.
«مەن ءوزىمنىڭ تازا، ادال، رۋحاني ورتادا ءوسىپ-ءونىپ، ءومىر ءسۇرىپ جاتقانىمدى كوردىم. «قولدا بار التىننىڭ قادىرىن ءبىل» دەگەن شىعار ماعان. جەر ورتاسىنا كەلگەندە قۇداي تاعالا «ايدىڭ ارعى بەتىندەگى تۇنەكتىڭ» قانداي بولاتىنىن كورسەتتى ماعان. كوردىم دە شوشىدىم. كۇرەستىم. ادال اتىم ءۇشىن، ادىلەت ءۇشىن، بالام ءۇشىن... ايەلدەرگە قارسى زورلىق-زومبىلىق تاقىرىبى – ادام قۇقىعى تاقىرىبى. مەن ءوزىمنىڭ ادام رەتىندەگى قۇقىعىمدى قورعادىم. بۇل جولدا قانشاما كەدەرگىلەردەن ءوتۋ كەرەك ەكەنىن كوردىم. كوزىم جەتتى. ادۆوكاتتارىما ەرەكشە العىس ايتامىن. بىرلىك پەن بىلىكتىلىك ارقاسىندا ءبىر كوماندا بولىپ جۇمىس ىستەدىك. ەندىگى جەردە مەنىڭ جازاتىن، ايتاتىن، بۇقارا ساۋاتىن اشاتىن ماماندارمەن بولاتىن سۇحباتتارىمنىڭ تاقىرىبى وسى ماسەلەلەرگە دە ارنالادى. قاپاستا جۇرگەن ايەلدەرگە ايتارىم: قىسپاقتا ۇستاعىسى كەلگەن ەركەك تەك اشىقتىقتان قورقادى. باتىل بولىڭىزدار! مەنى دە «ۇيات بولادى، ءوز ارتىڭدى ءوزىڭ اشاسىڭ با؟»دەپ ۇستاعىسى كەلدى. بۇل –قىلمىسكەردىڭ ءادىسى. سەنبەڭىزدەر! زاڭ! تەك قانا زاڭعا جۇگىنىڭىز! ءيا ۇزاق جول، ءيا بۇل كۇرەس! بىراق... بارلىعى اياقتالعان سوڭ ءالىمنىڭ ايتقانى جانىمدى جۇباتتى. «بالام، مەن وسى وقيعادا ءبىر كىنام بولسا، سەنىڭ الدىڭدا كىنالىمىن» دەدىم. ون ءۇش جاستاعى بالامنىڭ ايتقانى: «ماما، ءوزىڭىزدى كىنالاي بەرمەڭىز، ءسىز باقىتتى بولامىز دەپ ويلادىڭىز عوي»، - دەپ جازدى تەلەجۇرگىزۋشى.
