اقمولا وبلىسىنىڭ اكىمدىگى مەن «Viamedis» كومپانياسى اراسىندا قوسشى قالاسىندا 1000 كەلۋشىگە ارنالعان ەمحاناسى بار 300 ورىندىق كوپسالالى اۋرۋحانا قۇرىلىسىن سالۋ تۋرالى مەموراندۋمعا قول قويىلدى.
«Viamedis» جشس-ءتىڭ باسشىسى اسەت احمەتوۆتىڭ ايتۋىنشا، ەمحاناسى بار جاڭا كوپسالالى وبلىستىق اۋرۋحانا قوسشى قالاسى مەن وعان جاقىن 6 اۋدان تۇرعىندارىنا بارلىق قاجەتتى مەديتسينالىق كومەك كورسەتەدى. سونداي-اق اتا-انالار ءبولىمى، جۇكتى ايەلدەر مەن جاڭا تۋعان نارەستەلەرگە ارنالعان پاتولوگيا جانە ونكولوگيالىق كومەكتىڭ تولىق كەشەنى بولادى. كادرلاردى تارتۋ ءۇشىن 96 پاتەرلى ءۇي مەن پانسيونات سالۋ جوسپارلانۋدا.
«حالىققا ساپالى ءارى قولجەتىمدى مەديتسينالىق كومەك كورسەتۋ – دەنساۋلىق ساقتاۋ جۇيەسىنىڭ باستى ماقساتتارىنىڭ ءبىرى. سوندىقتان مەملەكەت باسشىسىنىڭ كورسەتىلەتىن قىزمەت ساپاسىن ارتتىرۋ جونىندەگى تاپسىرماسىن ورىنداۋ ءۇشىن بارلىق شارالاردى قابىلداۋ قاجەت. جاڭا مەديتسينالىق مەكەمەنىڭ ىسكە قوسىلۋىمەن اقمولالىقتاردىڭ ساپالى ەم الۋى قولجەتىمدى بولادى»، - دەدى وبلىس اكىمى.
سونداي-اق، ءىس-ساپار اياسىندا اكىم تايتوبە اۋىلىنداعى راحىمجان قوشقارباەۆ اتىنداعى اللەيانىڭ اباتتاندىرىلاتىن ورنىندا بولدى. نىسان رەيحستاگقا جەڭىس تۋىن العاش تىككەن باتىردىڭ 100 جىلدىعىنا وراي سالىنادى دەپ جوسپارلانۋدا.
سوڭىندا وبلىس اكىمى قالا اكتيۆىمەن كەزدەسىپ، وزەكتى ماسەلەلەردى شەشۋ بويىنشا تاپسىرمالار بەردى، سونداي-اق ازاماتتاردى جەكە قابىلداۋ جۇرگىزدى.
