مەملەكەتتىك قىزمەتشىلەرمەن قىزمەتتىك ەتيكانى بۇزۋ فاكتىلەرى تۋرالى ونلاين حابارلاۋعا بولادى. بۇل تۋرالى قر مەملەكەتتىك قىزمەت ىستەرى اگەنتتىگىنىڭ قوعاممەن بايلانىس دەپارتامەنت باسشىسىنىڭ ورىنباسارى جاننا باستاروۆا ايتتى، دەپ حابارلايدى قازاقپارات ءتىلشىسى.
«اگەنتتىكتىڭ جاڭا سايتىندا (qyzmet.gov.kz) مەملەكەتتىك قىزمەتتەگى بوس ورىندار تۋرالى بىلۋگە بولادى. جاڭا سايتتى 2 اپتا بويى تەستىلەۋدەن وتكىزدىك. مەملەكەتتىك جانە قۇقىق قورعاۋ قىزمەت ەتۋگە ىنتاسى بار ازاماتتار ءۇشىن «مەملەكەتتىك قىزمەتكە تۇسكىم كەلەدى» ارنايى ءبولىمى ىسكە قوسىلدى. جانە ول جەردەگى اقپارات كۇندەلىكتى جاڭارتىلىپ تۇرادى. سونىمەن قاتار، ول بولىمدە رەسپۋبليكالىق جانە وڭىرلىك دەڭگەيلەردە مەملەكەتتىك اكىمشىلىك لاۋازىمدارعا ورنالاسۋعا ارنالعان بايقاۋلار تۋرالى حابارلاندىرۋلار جاريالانادى»، - دەدى جاننا باستاروۆا. سونداي-اق، اگەنتتىك وكىلى ەندىگى ۋاقىتتا مەملەكەتتىك قىزمەتشىلەردىڭ ادەپسىز مىنەز-قۇلقىنا ونلاين تۇردە شاعىمدانۋ مۇمكىندىگى پايدا بولعانىن ايتىپ ءوتتى. «مەملەكەتتىك قىزمەتشىلەرمەن قىزمەتتىك ەتيكانى بۇزۋ فاكتىلەرى تۋرالى حابارلاۋ ءۇشىن «ادەپسىز مىنەز-قۇلىق تۋرالى حابارلاۋ» ءبولىمى جۇمىس جاسايدى. ول جەردە بەيادەپ قىلىق كورسەتكەن مەملەكەتتىك قىزمەتشىنىڭ اتى-ءجونى مەن قىزمەتىن قالدىرادى. جانە ۋاقىتىن كورسەتۋ قاجەت. ودان ءارى ول شاعىم مەملەكەتتىك قىزمەت سالاسىنداعى باقىلاۋ دەپرتامەنتىنە جونەلتىلەدى. ونداعى ماماندار ماسەلەنىڭ ءمان جايىن انىقتاپ تەكسەرەدى. ودان بولەك، اتالعان بولىمدە دەپارتامەنت باسشىلارىنىڭ جۇمىس تەلەفوندارى كورسەتىلگەن. ياعني، باسشىلىققا تىكەلەي حابارلاسىپ ايتۋعا دا بولادى»، - دەدى ول.
"ادىرنا" ۇلتتىق پورتالى
