بۇگىن، 12 ماۋسىم – قازاقستان حالىق اعارتۋ كوميسسارياتىنىڭ ۇيىمداستىرۋىمەن ءدال 100 جىل بۇرىن 1924 جىلى ورىنبوردا العاش رەت قازاق ءبىلىمپازدارىنىڭ سەزى شاقىرىلعان كۇن، دەپ جازادى “ادىرنا” ۇلتتىق پورتالى.
قازاق اسسر-ءى ورناعاننان سوڭ 1924 جىلى ورىنبوردا ماۋسىمنىڭ 12-سىندە قازاق (قىرعىز) ءبىلىمپازدارىنىڭ تۇڭعىش سەزى شاقىرىلدى. وسى سەزدە 12-13 جىل بويى قولدانىلىپ، ورنىعىپ قالعان قازاق ءتىلىنىڭ دىبىستىق تابيعاتىنا لايىقتالىپ وزگەرتىلگەن، رەسمي تۇردە قابىلدانعان ءالفاۆيتتىڭ ءمانى جونىندە، دىبىس ادىسىمەن وقىتۋ ءىسى جونىندەگى ماسەلەلەر تالقىلاندى.
التى كۇنگە سوزىلعان جيىننىڭ كۇن تارتىبىندە 6 وزەكتى ماسەلە قارالعان ەكەن. بۇلار: جازۋ مەن ءالىپبي ماسەلەلەرى، قازاقشا ءپان سوزدەرى، اۋىز ادەبيەتىن جيۋ شارالارى، وقۋ، عىلىم كىتاپتارىن كوبەيتۋ جانە باستاۋىش مەكتەپتىڭ باعدارلامالارى.
پروفەسسور شەرۋباي قۇرمانبايۇلىنىڭ پىكىرىنشە، سەزدە، اسىرەسە ءتىل ماسەلەسىنە ايرىقشا كوڭىل بولىنگەن. سەزدىڭ كۇن تارتىبىندەگى نەگىزگى التى ماسەلەنىڭ ۇشەۋىن، ياعني تەڭ جارتىسىن تىكەلەي ءتىل ماسەلەلەرى قۇراعان. ءبىلىمپازدار قۇرىلتايى قازاق ءتىلى مەن ادەبيەتىنىڭ عىلىمي جۇيەسى، اسىرەسە ءالىپبي، ورفوگرافيا، تەرمينولوگيا، وقىتۋ ادىستەمەسى، ونوماستيكا ت. ب. سالالار بويىنشا ماڭىزدى قاۋلىلار قابىلدايدى. زيالىلار باسقوسۋىنىڭ جانە ءبىر ماڭىزدىسى – سوناۋ قاساڭ زاماندا اعارتۋشىلىققا، ءبىلىم مەن عىلىمعا قاتىستى كوتەرىلگەن ماسەلەنىڭ ءالى كۇنگە دە وزەكتى بولىپ تۇرۋىندا.
