اقمولا وبلىسىندا 537 مەكتەپ 20 مبيت/س جانە ودان جوعارى نورمالارعا سايكەس، ونىڭ ىشىندە Starlink سپۋتنيكتىك جابدىعىن ورناتۋ ارقىلى جوعارى جىلدامدىقتى ينتەرنەتپەن قامتاماسىز ەتىلگەن.
وبلىستىڭ ءبىلىم بەرۋ سالاسىندا ينفوكوممۋنيكاتسيالىق ينفراقۇرىلىمدى جاڭعىرتۋدى، جەرگىلىكتى جەلىلەردى، تسيفرلىق ءبىلىم بەرۋ كونتەنتىن ورناتۋدى قامتيتىن تسيفرلىق تەحنولوگيالاردى پايدالانۋ ەسەبىنەن ءبىلىم بەرۋ پروتسەسىن جاقسارتۋعا باعىتتالعان بىرقاتار جوبالار جۇزەگە اسىرىلۋدا.
اقمولا وبلىستىق ءبىلىم باسقارماسىنىڭ مالىمەتىنشە، قازىرگى ۋاقىتتا وبلىستىڭ بارلىق مەكتەپتەرى كەڭ جولاقتى جوعارى جىلدامدىقتى ينتەرنەتكە قوسىلعان. قر ءبىلىم مينيسترلىگى تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ ءبىلىم بەرۋ مەكەمەلەرىندە ينتەرنەت ساپاسىنا جاڭا تالاپتار قويدى. اعىمداعى جىلدىڭ قاڭتار ايىندا پيلوتتىق جوبا ىسكە قوسىلدى، وعان رەسپۋبليكانىڭ 2 مىڭ مەكتەبى كىردى. جوبا ينتەرنەت بايلانىسىنىڭ جىلدامدىعىن 150-دەن 230 مبيت/سەك-كە دەيىن قامتاماسىز ەتەتىن Starlink سپۋتنيكتىك جابدىعىن ورناتۋدى كوزدەيدى. پيلوتتىق جوباعا اقمولا وبلىسىنىڭ 270 مەكتەبى ەنگىزىلدى. وبلىستىڭ شالعاي اۋىلدارىنداعى ءبىلىم بەرۋ مەكەمەلەرىنە ارتىقشىلىق بەرىلەدى. ونىڭ ىشىنە ءبىرجان سال اۋدانىنداعى زاوزەرنىي، جۇكەي، ۇلگى، ماكينكا، كراسنوفلوتسكوە، زاۋرالوۆكا، ماماي، بۇلاندى، قوعام، ءبىرسۋات ءتارىزدى ون ەكى مەكتەپ كىرەدى.
بۇگىنگى تاڭدا Starlink سپۋتنيكتىك جابدىعى وبلىستىڭ 270 مەكتەبىندە 150-دەن 230 مبيت/سەك دەيىنگى دەرەكتەر بەرۋ جىلدامدىعىمەن ورناتىلعان. تاعى 6 مەكتەپتە ورناتۋ جۇمىستارى اياقتالىپ كەلەدى.
ايتا كەتەيىك، اتالعان مەكتەپتەردى جوعارى جىلدامدىقتى ينتەرنەتپەن قامتاماسىز ەتۋ ءۇشىن اقمولا وبلىسىنىڭ تسيفرلاندىرۋ جانە ارحيۆتەر باسقارماسى قوسىمشا 400 ميلليون تەڭگە ءبولدى.
مامانداردىڭ ايتۋىنشا، سپۋتنيكتىك سيگنالدى قابىلداۋعا ارنالعان جابدىقتى ورناتۋ بىرنەشە ساعاتتى الادى، ورناتۋ قيىندىقسىز وتەدى. تەحنولوگيا ءبىر ۋاقىتتا 10-15 كومپيۋتەردى قوسقاندا 120-150 مبيت/س جىلدامدىقتا دەرەكتەردى بەرۋ جىلدامدىعىن الۋعا مۇمكىندىك بەرەدى. ال جەرگىلىكتى جەلىنى Starlink-كە تىكەلەي قوسقاندا 300 مبيت/س دەيىن ارتادى، سونىڭ ارقاسىندا رەسمي سايتتار مەن دەرەكقورلارداعى سۇرانىستاردى جەدەل وڭدەۋگە مۇمكىندىك تۋدى. ەكى اي ىشىندە سپۋتنيكتىك ينتەرنەتتىڭ ۇزىلىستەرىن پايدالانۋ بايقالمادى، بۇل ونىڭ سەنىمدىلىگى مەن تۇراقتىلىعىن كورسەتەدى.
Starlink سپۋتنيكتىك جابدىقتارىن قولدانۋ وقۋشىلارعا اقپاراتتى جىلدام تابۋعا، وقۋ روليكتەرىن كورۋگە جانە پاندەر بويىنشا قوسىمشا اقپارات ىزدەۋگە، ونلاين-وليمپيادالار مەن كونكۋرستارعا قاتىسۋعا مۇمكىندىك بەرەدى.
