"قازاق ءتىلى مىندەتتى ەمەس" دەپ جارناما تاراتقان Forte بانك باسقارما توراعاسى بەكجان ءپىرماتوۆ قازاق تىلىنە قاتىستى داۋعا جاۋاپ بەردى، دەپ حابارلايدى "ادىرنا" ۇلتتىق پورتالى ۇلىسمەدياعا سىلتەپ.
وتكەن ايدا قازاقستانداعى بانك الەۋمەتتىك جەلىدە جارناما تاراتىپ باسى داۋعا قالعان. سەبەبى قىزمەتكەرلەردى شاقىرۋ ماقساتىندا جاسالعان جارنامادا قازاق ءتىلىن ءبىلۋدىڭ ماڭىزى جوق ەكەنى كورسەتىلگەن. جەلى قولدانۋشىلارى تاقىرىپتى قىزۋ تالقىلاپ، كوپتىڭ اشۋىن تۋدىرعان. بۇگىندە بانك باسشىسى باسقارما تاراپىنان كەتكەن قاتەلىكتى مويىندادى.
ء“بىزدىڭ تاراپىمىزدان سونداي قاتەلىك كەتتى. ونى مويىندايمىز. 4000-نان استام ادام جۇمىس ىستەيدى دەدىم، جىلىنا ورتا ەسەپپەن 800-900 ادام اۋىسىپ وتىرادى. سول ورىنعا جاڭا ادامداردى تارتۋ ءۇشىن، ءتۇرلى پلاتفورمالارعا جارناما بەرەمىز. قىزمەتكەر بىردەن تابىلا بەرمەيدى. جارنامامىزدى ەكى نە ءۇش رەت قايتالاپ سالامىز. مىسالى، سوڭعى جىلدا 1600 رەت جاريالاندى. وسىنداي كەزدە قاتەلىك كەتتى،”- دەدى ءپىرماتوۆ.
Forte بانك توراعاسى جارنامالىق حابارلاندىرۋدىڭ روبوتيزاتسيا كۇشىمەن دايىندالاتىنىن ايتىپ، اقتالدى.
ء“بىز 1600 حابارلاندىرۋدى ادام كۇشىمەن ەمەس، روبوتيزاتسيا كومەگىمەن جاسايمىز دەپ شەشكەنبىز. ال وعان كەرەك مالىمەتتەردى قىزمەتكەرلەر دايىندايدى. حابارلاندىرۋ بەرۋدى ايتي ماماندارى دايىنداپ سالعان. ايتي دەگەن باعدارلامالاۋشىلار عوي. ولار قازاق ءتىلى كەرەك ەمەس دەپ جازىپ جىبەرگەن. ال روبوتيزاتسيا قانداي مالىمەت بار، سونىمەن ۆاكانسيالار پلاتفورماسىنا سالعان. ياعني، ادامي فاكتور ەكەنىن مويىندايمىز. ءوزىمىزدىڭ ىشكى پروتسەستەرىمىزگە وزگەرىس ەنگىزدىك. قاتەمىزدى تۇزەتتىك،”- دەپ جاۋاپ بەردى بەكجان ءپىرماتوۆ.
