بۇگىن استانادا «اتامەكەن قازاقستان كارتاسى» ەتنو-مەموريالدى كەشەنىنىڭ اشىلۋىنا جانە بالالاردى قورعاۋ كۇنىنە وراي اشىق ەسىك كۇنى ءوتتى دەپ حابارلايدى Adyrna.kz ءتىلشىسى.
بالالاردى قورعاۋ كۇنىنە وراي جەرگىلىكتى ونەرپازداردىڭ قاتىسۋىمەن «بالالاردان بالالارعا» كونتسەرتتىك باعدارلاماسى ءوتتى.
سونداي-اق، كەلۋشى قوناقتار جانە بالالار كەشەنگە تەگىن كىرگىزىلدى. 500-دەن اسا بالا مەن اتا-انالار كەشتىڭ قۇرمەتتى قوناعى بولدى.
ەستەرىڭىزگە سالايىق، «اتامەكەن» قازاقستان كارتاسى» ەتنو-مەموريالدىق كەشەنى 1,7 گەكتار جەر اۋماعىنا كەڭ بايتاق ەلىمىز قالالارىنىڭ ساۋلەتتىك جانە تابيعي كورىكتى ولكەلەرىنىڭ شاعىن عانا كوشىرمەلەرىن ماكەت تۇرىندە ورنالاستىرعان استاناداعى ەرەكشە كەشەن.
«اتامەكەن» قازاقستان كارتاسى» ەتنو-مەموريالدىق كەشەنى 2001 جىلى 8 قىركۇيەكتە اشىلعان.
«اتامەكەن» كەشەنى قازىرگى تاڭدا كەلۋشىلەرگە تاڭداي قاقتىرارلىق جادىگەرلەر ۇسىناتىن تانىم مەن تاعىلىمنىڭ ايتۋلى ورداسىنا اينالدى.
شاعىن اۋماققا جاسالعان ۇلكەن كارتادا قىزىلقۇمنىڭ كۇرىشتى، ماقتالى القاپتارى مەن قاراعاندىنىڭ كومىرى، ماڭعىستاۋدىڭ مۇنايى، قارت بۋراباي، قورعالجىننىڭ ەركە قۇستارى مەن كاسپيدىڭ ارۋ اققۋلارى، الاتاۋدىڭ اق باس شىڭدارى، تاعى دا باسقا ايتىپ تاۋىسا المايتىن قازىنالى قازاق دالاسى اسەم بەينەلەنگەن. بۇل كارتادا ەلىمىزدىڭ 14 وبلىسى مەن الماتى، استانا، شىمكەنت قالالارى كورسەتىلگەن. تابيعي-كليماتتىق اۋماقتاردىڭ سان تۇرلىلىگى مەن لاندشافتارى، ساۋلەتى مەن قۇرىلىس سالالارىن دا قامتىعان ەكسپوناتتار اراسىندا تاريحي جانە مادەني ەسكەرتكىشتەرگە ەرەكشە ورىن بەرىلگەن.
ەتنو-مەموريالدىق كەشەن حالىققا مادەني قۇندىلىقتارىمىزدى ناسيحاتتاي وتىرىپ، جاستاردىڭ وتانشىلدىق سەزىمدەرىن وياتۋ، ەلىنە، جەرىنە دەگەن ىستىق ىقىلاستارىن ارتتىرۋ، سول ارقىلى تاۋەلسىزدىكتى باياندى ەتۋگە باۋلۋدى كوزدەيدى.
