كوكتەمگى سۋ تاسقىنى كوپتىڭ كوڭىلىن كۇپتى ەتكەنى راس. تالاي اۋىلدى سۋ باسىپ، ءبىراز جەرلەسىمىزدى باسپاناسىز قالدىرعان توپان سۋ العاشقىلاردىڭ ءبىرى بولىپ ءبورلى اۋدانىنا قاراستى اقسۋ اۋىلىنا كىردى.
146 ءتۇتىنى بار اۋىلدىڭ كوكتەمگى تىنىش كەشىن ارناسىنان اسقان شىڭعىرلاۋ وزەنى بۇزدى. اۋىل اكىمى عاريفوللا وتەپبەرگەنوۆتىڭ ايتۋىنشا، ەلدى مەكەننىڭ شىعىسنان تاسىعان سۋ 78 ۇيگە كىرىپتى.
–ارنايى كوميسسيا 44 ءۇيدى جارامسىز دەپ تانىدى. 34 تۇرعىن سۋ كىرگەن ءۇيىن جوندەۋگە قاجەتتى قاراجاتىن الدى. ون ادام اقساي قالاسىنا كوشەمىز دەپ شەشتى. جالپى مەملەكەت تاراپىنان بەرىلەتىن بارلىق الەۋمەتتىك كومەك اۋىل ازاماتتارىنا كورسەتىلدى،–دەيدى عاريفوللا وتەپبەرگەنوۆ.
تاسقىننان زارداپ شەككەن اقسۋلىقتاردىڭ ءبىرى – ارداق ءادىراحمانوۆا. بەس كۇن بويى ءۇيى سۋ استىندا تۇرعانىن ايتقان ارداق حانىم تاسقىن كەزىندە اۋىلداعى ۋاقىتشا ورنالاستىرۋ ورنىندا تۇرعان. ابىروي بولعاندا ساپالى ماتەريالدان سالىنعان ءۇيى قۇلاماپتى. ەدەندەرىن اشىپ، ءۇي ىرگەسى مەن بولمەلەردى كەپتىرىپ جاتقان اۋىل تۇرعىنى جەر اياعى كەڭىگەن سوڭ جوندەۋ جۇمىستارىن باستاۋدى جوسپارلاپ وتىر.
–وسىدان ءبىر اپتا بۇرىن ءۇي جوندەۋگە قاجەتتى قاراجات ءتۇستى. كەرەك دەگەن قۇرىلىس زاتتارىن الىپ كەلدىك. كۇن ىسىپ، بولمەلەردەگى ىلعال كەپكەن سوڭ جۇمىسىمىز باستالادى،–دەيدى ارداق ءادىراحمانوۆا.
قازىرگى تاڭدا اۋىلدا 23 جاڭا ءۇي سالىنىپ جاتىر. باسپانالاردىڭ ىرگەتاسى قۇيىلدى. ءۇيى جارامسىز دەپ تانىلعان اقسۋ اۋىلىنىڭ تۇرعىنى – بوتاگوز تورتباەۆا. قىرىق جىلدان بەرى اتالعان اۋىلدا تۇراتىن ونىڭ وتباسى وسى كەزگە دەيىن ۋاقىتشا ورنالىستىرۋ ورنىن پانالاعان.
ء–ۇيىمىز سۋعا كەتكەنى كوڭىلىمىزدى تۇسىرگەنى راس. بىراق ەلدىڭ كومەگىن سەزىنىپ وتىردىق.
تاماقتان تارشىلىق كورمەدىك، كيىم-كەشەككە دەيىن الدىق. جاڭا باسپانا قاشان تۇرعىزىلىپ بولار ەكەن دەپ الاڭداعان ەدىك. ىرگەتاسىن قۇيىپ جاتىر. ول بىزگە ءۇمىت سىيلادى. وقۋ جىلى باستالعانشا جاڭا ۇيگە كىرەمىز دەپ سەنەمىز،– دەيدى بوتاگوز تورتباەۆا.
تۇگەلباي بيسەن
