Kóktemgi sý tasqyny kóptiń kóńilin kúpti etkeni ras. Talaı aýyldy sý basyp, biraz jerlesimizdi baspanasyz qaldyrǵan topan sý alǵashqylardyń biri bolyp Bórli aýdanyna qarasty Aqsý aýylyna kirdi.
146 tútini bar aýyldyń kóktemgi tynysh keshin arnasynan asqan Shyńǵyrlaý ózeni buzdy. Aýyl ákimi Ǵarıfolla Ótepbergenovtyń aıtýynsha, eldi mekenniń shyǵysnan tasyǵan sý 78 úıge kiripti.
–Arnaıy komıssııa 44 úıdi jaramsyz dep tanydy. 34 turǵyn sý kirgen úıin jóndeýge qajetti qarajatyn aldy. On adam Aqsaı qalasyna kóshemiz dep sheshti. Jalpy memleket tarapynan beriletin barlyq áleýmettik kómek aýyl azamattaryna kórsetildi,–deıdi Ǵarıfolla Ótepbergenov.
Tasqynnan zardap shekken aqsýlyqtardyń biri – Ardaq Ádirahmanova. Bes kún boıy úıi sý astynda turǵanyn aıtqan Ardaq hanym tasqyn kezinde aýyldaǵy ýaqytsha ornalastyrý ornynda turǵan. Abyroı bolǵanda sapaly materıaldan salynǵan úıi qulamapty. Edenderin ashyp, úı irgesi men bólmelerdi keptirip jatqan aýyl turǵyny jer aıaǵy keńigen soń jóndeý jumystaryn bastaýdy josparlap otyr.
–Osydan bir apta buryn úı jóndeýge qajetti qarajat tústi. Kerek degen qurylys zattaryn alyp keldik. Kún ysyp, bólmelerdegi ylǵal kepken soń jumysymyz bastalady,–deıdi Ardaq Ádirahmanova.
Qazirgi tańda aýylda 23 jańa úı salynyp jatyr. Baspanalardyń irgetasy quıyldy. Úıi jaramsyz dep tanylǵan Aqsý aýylynyń turǵyny – Bótagóz Tórtbaeva. Qyryq jyldan beri atalǵan aýylda turatyn onyń otbasy osy kezge deıin ýaqytsha ornalystyrý ornyn panalaǵan.
–Úıimiz sýǵa ketkeni kóńilimizdi túsirgeni ras. Biraq eldiń kómegin sezinip otyrdyq.
Tamaqtan tarshylyq kórmedik, kıim-keshekke deıin aldyq. Jańa baspana qashan turǵyzylyp bolar eken dep alańdaǵan edik. Irgetasyn quıyp jatyr. Ol bizge úmit syılady. Oqý jyly bastalǵansha jańa úıge kiremiz dep senemiz,– deıdi Botagóz Tórtbaeva.
Túgelbaı Bısen
