بىشكەكتە جەرگىلىكتى تۇرعىندار مەن شەتەلدىكتەر توبەلەسىپ، ارتى جاپپاي تارتىپسىزدىككە ۇلاستى، دەپ حابارلايدى «ادىرنا» ءتىلشىسى 24.kg-گە سىلتەمە جاساپ.
قىرعىزستاننىڭ سۆەردلوۆ اۋدانىنا قاراستى ىشكى ىستەر باسقارماسى 13 مامىر كۇنى بۋديوننىي كوشەسىندە ورنالاسقان حوستەل ماڭىندا توبەلەس بولعانىن مالىمدەدى. ناتيجەسىندە قىرعىز رەسپۋبليكاسى قىلمىستىق كودەكسىنىڭ 280-بابى 2-بولىگى 1-تارماعى بويىنشا قىلمىستىق ءىس قوزعالدى. پوليتسيانىڭ ايتۋىنشا، شەتەلدىكتەر جەرگىلىكتى تۇرعىنداردى ۇرىپ-سوققان.
الايدا 18 مامىرعا قاراعان ءتۇنى 700-گە جۋىق ادام قۇرمانجان داتقا كوشەسىنە جينالىپ، وقيعاعا نارازىلىق ءبىلدىردى. ولار بيلىكتەن جانجالعا قاتىسۋشىلاردى جازاعا تارتۋدى تالاپ ەتتى.
دەنساۋلىق ساقتاۋ مينيسترىلىگىنىڭ مالىمەتىنشە، بىشكەكتەگى ستيحيالىق نارازىلىق كەزىندە 27 ادام زارداپ شەكتى. ولاردىڭ بارلىعى — شەتەلدىكتەر.
سەنبى كۇنى تاڭعى ساعات 4-تە قىرعىزستان ىشكى ىستەر مينيسترلىگى بىشكەكتە جاعداي تۇراقتالعانىن حابارلادى.
قىرعىزستاننىڭ ۇلتتىق قاۋىپسىزدىك جونىندەگى مەملەكەتتىك كوميتەتىنىڭ توراعاسى قامشىبەك تاشيەۆ بۇل وقيعاعا قاتىستى مالىمدەمە جاسادى.
«ەلوردادا 18 بەن 25 جاس ارالىعىنداعى 700-گە جۋىق ادام جينالدى. ولار ەلدە پاكىستان، بانگلادەشت، ەگيپەت،ءۇندىستان سىندى ەلدەردەن كەلەتىن ميگرانتتار سانىنىڭ كۇرت وسۋىنە نارازىلىق ءبىلدىردى. ولاردىڭ تالاپتارى بەلگىلى ءبىر دارەجەدە دۇرىس دەپ ويلايمىن. ۇكىمەت ءتيىستى شارالاردى قولعا الىپ جاتىر. كۇن سايىن ەلىمىزدە زاڭسىز جۇرگەن 20-30 شەتەل ۇستالادى. كەشەگى شەرۋگە جينالعانداردىڭ اراسىنان ارام نيەتتىلەردى كورگەن جوقپىز، بىراق ىشىندە ارانداتۋشىلار بولدى. ولاردىڭ كىم ەكەنى انىقتالىپ، جاقىن ارادا جاۋاپقا تارتىلاتىن بولادى»،—دەدى ول.
