Bışkekte jergılıktı tūrǧyndar men şeteldıkter töbelesıp, arty jappai tärtıpsızdıkke ūlasty, dep habarlaidy «Adyrna» tılşısı 24.kg-ge sılteme jasap.
Qyrǧyzstannyŋ Sverdlov audanyna qarasty Işkı ıster basqarmasy 13 mamyr künı Budionnyi köşesınde ornalasqan hostel maŋynda töbeles bolǧanyn mälımdedı. Nätijesınde Qyrǧyz Respublikasy Qylmystyq kodeksınıŋ 280-baby 2-bölıgı 1-tarmaǧy boiynşa qylmystyq ıs qozǧaldy. Polisiianyŋ aituynşa, şeteldıkter jergılıktı tūrǧyndardy ūryp-soqqan.
Alaida 18 mamyrǧa qaraǧan tünı 700-ge juyq adam Qūrmanjan Datqa köşesıne jinalyp, oqiǧaǧa narazylyq bıldırdı. Olar bilıkten janjalǧa qatysuşylardy jazaǧa tartudy talap ettı.
Densaulyq saqtau ministrılıgınıŋ mälımetınşe, Bışkektegı stihiialyq narazylyq kezınde 27 adam zardap şektı. Olardyŋ barlyǧy — şeteldıkter.
Senbı künı taŋǧy saǧat 4-te Qyrǧyzstan ışkı ıster ministrlıgı Bışkekte jaǧdai tūraqtalǧanyn habarlady.
Qyrǧyzstannyŋ ūlttyq qauıpsızdık jönındegı memlekettık komitetınıŋ töraǧasy Qamşybek Taşiev būl oqiǧaǧa qatysty mälımdeme jasady.
«Elordada 18 ben 25 jas aralyǧyndaǧy 700-ge juyq adam jinaldy. Olar elde Päkıstan, Bangladeşt, Egipet,Ündıstan syndy elderden keletın migranttar sanynyŋ kürt ösuıne narazylyq bıldırdı. Olardyŋ talaptary belgılı bır därejede dūrys dep oilaimyn. Ükımet tiıstı şaralardy qolǧa alyp jatyr. Kün saiyn elımızde zaŋsyz jürgen 20-30 şetel ūstalady. Keşegı şeruge jinalǧandardyŋ arasynan aram niettılerdı körgen joqpyz, bıraq ışınde arandatuşylar boldy. Olardyŋ kım ekenı anyqtalyp, jaqyn arada jauapqa tartylatyn bolady»,—dedı ol.
https://youtu.be/hWLbcP9r45E?si=VOeN15knP8LlJDVY
