بۇگىن كوكشەتاۋ قالاسىندا اقمولا وبلىسىنىڭ اكىمى مارات احمەتجانوۆتىڭ شاقىرۋىمەن ەلىمىزدىڭ ۇزدىك دارىگەرلەرى كەلدى. ولاردىڭ قاتارىندا ۇلتتىق عىلىم اكادەمياسىنىڭ اكادەميگى، قر مەملەكەتتىك سىيلىعىنىڭ لاۋرەاتى، قازاقستاننىڭ ەڭبەك ەرى، «ۇلتتىق نەيروحيرۋرگيا ورتالىعى» اق باسقارما توراعاسى، ەلىمىزدىڭ باس شتاتتان تىس نەيروحيرۋرگى سەرىك اقشولاقوۆ، قر ەڭبەك سىڭىرگەن قايراتكەرى، حالىقارالىق گەپاتولوگ-حيرۋرگتار قاۋىمداستىعىنىڭ مۇشەسى سەرىك توقپانوۆ، كلينيكالىق جانە ىرگەلى مەديتسينا عىلىم اكادەمياسىنىڭ اكادەميگى، «استانا» مەديتسينا ۋنيۆەرسيتەتىنىڭ ونكولوگيا كافەدراسىنىڭ مەڭگەرۋشىسى اباي ماقىشەۆ، جوعارى ساناتتى حيرۋرگ-دارىگەر، سىزعانوۆ اتىنداعى حيرۋرگيا عىلىمي ورتالىعىنىڭ بولىمشە مەڭگەرۋشىسى ماقسات دوسحانوۆ جانە وزگە دە تانىمال دارىگەرلەر بار.
ولار اقمولا وبلىستىق كوپسالالى اۋرۋحاناسىنىڭ بازاسىندا پورتالداردا تۇرعان جانە ستاتسيونارلاردا ەمدەلىپ جاتقان ءوڭىردىڭ 240-تان استام تۇرعىنىنا كونسۋلتاتسيا بەرسە، 4 ناۋقاسقا كۇردەلى وتا جاسادى. دارىگەرلەر توبى نەيروحيرۋرگيا، ونكولوگيالىق جانە حيرۋرگيالىق اۋرۋلار جانە جالپى مەديتسينا ماسەلەلەرى بويىنشا 50-گە جۋىق كونسۋلتاتسيا وتكىزدى.
مارات احمەتجانوۆ بۇگىنگى كەزدەسۋ وبلىس تۇرعىندارىنا، ونىڭ ىشىندە سۋ تاسقىنىنان زارداپ شەككەندەرگە مەديتسينالىق كومەك كورسەتۋ شەڭبەرىندە وتكىزىلەتىن وبلىس ءۇشىن وتە ماڭىزدى ەكەنىن اتاپ ءوتتى.
«مەملەكەت باسشىسى قاسىم-جومارت توقاەۆ سۋ تاسقىنىنان كەيىنگى كەزەڭدە مەديتسينا سالاسىنا، حالىققا مەديتسينالىق كومەك كورسەتۋ ساپاسىنا ەرەكشە نازار اۋدارىپ وتىر. قازىر حالىققا مەديتسينالىق كومەك كورسەتۋ ساپاسىنا كوڭىل ءبولۋ وتە ماڭىزدى. بۇگىن وبلىس تۇرعىندارىنىڭ اتىنان ءبىزدىڭ باستامامىزدى قولداعانىڭىزعا جانە اقمولا وبلىسىندا شەبەرلىك سىنىپتارى مەن كونسۋلتاتسيالار وتكىزۋگە ۋاقىت ءبولىپ كەلگەندەرىڭىز ءۇشىن العىس بىلدىرگىم كەلەدى. ءوز ءىسىنىڭ كاسىبي شەبەرلەرىنىڭ ءبىزدىڭ وبلىسىمىزدا جينالۋى سيرەك كەزدەسەتىن جاعداي. دياگنوستيكا جانە ەمدەۋدىڭ زاماناۋي تاسىلدەرى بويىنشا تاجىريبە الماسۋ وبلىسىمىزدىڭ دەنساۋلىعىن ودان ءارى دامىتۋ ءۇشىن قۋاتتى ىنتالاندىرۋ بولاتىنىنا سەنىمدىمىن. ەلىمىزدىڭ جەتەكشى مەديتسينالىق ورتالىقتارىمەن ىنتىماقتاستىقتى جالعاستىرۋدى جوسپارلاپ وتىرمىز، مۇنى ءبىزدىڭ وبلىسىمىزداعى قامقورلىقتىڭ ءبىر ءتۇرى دەپ سانايمىز»، - دەپ اتاپ ءوتتى وبلىس اكىمى.
كەزدەسۋدە «قازاقستاننىڭ التىن سكالپەلى» اتاعىنىڭ ەكى مارتە يەگەرى سەرىك توقپانوۆ جىلى شىرايلى قارسى العان وبلىس باسشىسىنا العىسىن ايتىپ، اقمولالىق ارىپتەستەرىمەن تاجىريبە الماسۋعا دايىن ەكەندىگىن اتاپ ءوتتى.
«اقمولا وبلىسىندا حيرۋرگيا جاقسى دامىعان. ءبىز تەك قانا ءوز سالامىز بويىنشا ەنگىزىلگەن وزگەرىستەرمەن جانە جاڭالىقتارمەن بولىسكىمىز كەلەدى. بۇگىن جەرگىلىكتى حيرۋرگتارمەن بىرلەسىپ، وتا جاسادىق. ارينە، وتانىڭ بارلىق ءادىسىن ءبىر رەت كورگەننەن يگەرىپ كەتۋ قيىن. ول ءۇشىن بىرلەسكەن وتالاردى بىرنەشە رەت جاساۋ قاجەت. اقمولالىق ارىپتەستەرىمىزمەن وسى باعىتتا شەبەرلىك الماسۋعا دايىنبىز» - دەدى سەرىك توقپانوۆ.
كەزدەسۋ قورىتىندىسى بويىنشا تاراپتار مەديتسينالىق ورتالىقتارمەن جانە وقۋ ورىندارىمەن وقىتۋ بويىنشا مەموراندۋم جاساسۋ، سونداي - اق، وبلىستىڭ دەنساۋلىق ساقتاۋ ۇيىمدارىندا ودان ءارى جۇمىسقا ورنالاسا وتىرىپ، جاستاردى تارتۋ، ءوڭىردىڭ مەديتسينا قىزمەتكەرلەرى ءۇشىن ادىسنامالىق كومەك كورسەتۋ تۋرالى ۇسىنىس ەنگىزدى.
