حالىقارالىق مۋزەيلەر كۇنى قارساڭىندا 15 مامىر كۇنى مالىك عابدۋللين مۇراجايىندا «مۋزەيدەگى ءتۇن» اكتسياسى ءوتتى. جىلداعى ءداستۇر بويىنشا، مۋزەي بۇل كۇنى تاڭعى ساعات 10-نان ءتۇن ورتاسىنا دەيىن كەلۋشىلەرگە ەسىگىن ايقارا اشتى.
كەلۋشىلەر ءۇشىن مۋزەي ەكسپوزيتسيالارى، سونداي-اق تۇركىستان وبلىسىنىڭ «ۇلى دالا ەلى» ورتالىعىنىڭ قورىنان «ۇلى دالا مۇراسى» تاريحي-تانىمدىق كورمەسى اشىلدى.
كورەرمەندەردىڭ نازارىنا قازاق حاندىعى ءداۋىرىن سيپاتتايتىن تاريحي ماڭىزى بار 30-عا جۋىق ەكسپونات ۇسىنىلدى. كورمەدەگى قۇندى جادىگەرلەرىنىڭ ءبىر بولىگى تاسقا قاشالعان، كىرپىشكە كۇيدىرىلگەن، اعاشقا ويىلىپ، ساق، رۋنا، اراب، لاتىن قارىپتەرىمەن جازىلعان حاتتار.
سونداي-اق، وسى كۇنى مالىك عابدۋللين مۋزەيىندە «ويىنشىقتار الەمى» كورمەسى اشىلدى. ەكسپوزيتسيادا ءحىح – حح عاسىردىڭ باسىندا جاسالعان ويىنشىقتار، كەڭەس وداعىنىڭ باتىرى مالىك عابدۋلليننىڭ قىزى مايدان مالىكقىزى مەن جيەنى ءلاززات امىرعوجينانىڭ مۋزەي قورىندا ساقتالعان ويىنشىقتارى، بالالار كىتاپتارى مەن الفاۆيتتەرى، سونداي - اق زاماناۋي قولدانبالى قولونەر شەبەرى، سۋرەتشى بايكوۆسكايا البينا كيريللوۆنانىڭ اۆتورلىق قۋىرشاقتارى قويىلعان.
ءىس-شارا اياسىندا بالۋان شولاق اتىنداعى وبلىستىق بالالار مەن جاسوسپىرىمدەر سپورت مەكتەبىنىڭ (جەتەكشىسى مۇراتبەك الماسبەك) جانە «اۋلەت» ورتالىعىنىڭ تاربيەلەنۋشىلەرى كورمەنى تاماشالاۋعا كەلگەن جاس بالالارعا «اسىق اتۋ»، «توعىزقۇمالاق» ينتەراكتيۆتى جانە ۇلتتىق ويىندارىن كورسەتى، ويناتتى.
ءبىرجان سال اتىنداعى مۋزىكا كوللەدجى ستۋدەنتتەرى مەن ساكەن ءجۇنىسوۆ اتىنداعى №18 مەكتەپ-ليتسەي وقۋشىلارىنىڭ ورىنداۋىنداعى مەرەكەلىك كونتسەرت ءىس-شارانىڭ كوركىن كەلتىردى.
