بۇگىن قازاقستان رەسپۋبليكاسىنىڭ سىرتقى ىستەر مينيسترلىگىنىڭ باستاماسىمەن اقمولا وبلىسىنا قاراستى قورعالجىن اۋدانىنىڭ قورعالجىن اۋىلىنا قازاقستاندا اككرەديتتەلگەن ديپلوماتيالىق ميسسيا مەن حالىقارالىق ۇيىمداردىڭ باسشىلارى كەلدى. قۇرمەتتى قوناقتار ايماقتىڭ ينۆەستيتسيالىق الەۋەتىمەن تانىسىپ، «تازا قازاقستان» رەسپۋبليكالىق ەكولوگيالىق اكتسياسىنا قاتىستى.
اقمولا وبلىسىنىڭ اكىمى مارات احمەتجانوۆ پەن دەلەگاتسيا باسشىلارى «دۋداراي» ستەللاسىنا 40-تان استام كوشەت وتىرعىزدى.
«مەملەكەت باسشىسى قاسىم-جومارت توقاەۆتىڭ «تازا قازاقستان» ەكولوگيالىق اكتسياسىن قولداۋ اياسىندا 15-كە جۋىق ەلدىڭ ديپلوماتيالىق ميسسيا باسشىلارى ەكولوگيامىزعا ۇلەس قوسىپ وتىر. اكتسياعا وبلىس تۇرعىندارى دا بەلسەندى قاتىسۋدا. بۇگىن «ءمولدىر بۇلاق» اپتالىعى اياسىندا سۋ ايدىندارى مەن وزەندەردىڭ جاعالاۋلارى تازارتىلدى. ايماقتاردى تازارتۋ جۇمىستارى جۇرگىزىلۋدە، ونداعان مىڭ اعاش وتىرعىزىلدى»، – دەپ اتاپ ءوتتى وبلىس اكىمى.
بۇدان ءارى دەلەگاتسيا وكىلدەرىنە اقمولا وبلىسىنىڭ ينۆەستيتسيالىق تارتىمدىلىعى، اتاپ ايتساق، ىڭعايلى ينۆەستيتسيالىق ەكوجۇيەسى، كولىك ينفراقۇرىلىمىنىڭ الەۋەتى، ءوڭىردىڭ اگرارلىق-يندۋستريالىق، ونەركاسىپتىك جانە تۋريستىك الەۋەتى تانىستىرىلدى.
وبلىستى مۋلتيپليكاتيۆتى دامىتۋ، جوعارى ءتيىمدى جانە باسەكەگە قابىلەتتى وندىرىستەر قۇرۋ، باسقارۋدىڭ زاماناۋي ادىستەرىن ەنگىزۋ، سونداي-اق ينۆەستيتسيالىق تارتىمدىلىقتى ارتتىرۋ ماقساتىندا وتكەن جىلدىڭ جەلتوقسانىندا ارشالى اۋدانىندا رەسپۋبليكالىق ماڭىزى بار «AQMOLA» يندۋستريالىق ايماعى قۇرىلعان بولاتىن.
سونداي-اق، جوبالاردى جىلدام وڭدەۋ، ولارعا «ءبىر تەرەزە» قاعيداتى ارقىلى قىزمەت كورسەتۋ، سۇيەمەلدەۋ، جەر ۋچاسكەسىن ىرىكتەۋ، ينۆەستيتسيالىق جوبالار ءۇشىن تەحنيكالىق شارتتاردى قورىتىندىلاۋعا كومەك كورسەتۋ ماقساتىندا اقمولا وبلىسىنىڭ اۋماعىندا «Aqmola Invest» ينۆەستيتسيالار تارتۋ ورتالىعى» قۇرىلدى.
«قازىرگى ۋاقىتتا ورتالىق تەحنيكالىق رەجيمدە جۇمىس ىستەپ جاتىر، ينۆەستورلارعا قىزمەت كورسەتۋ جانە وڭىرگە ينۆەستيتسيالىق جوبالاردى تارتۋ بويىنشا كەلىسسوزدەر جۇرگىزىلۋدە. سونداي-اق، ءبىزدىڭ وبلىس حالىقارالىق نارىق بويىنشا جانە استانا نارىعىنا جاقىن ءوز جوبالارىن ىسكە اسىرۋعا مۇددەلى حالىقارالىق دەلەگاتسيالاردىڭ قازاقستانعا ساپارلارىنا شولۋ جاسايدى»، – دەدى مارات احمەتجانوۆ.
ساپار اياسىندا شەتەلدىك قوناقتار قورعالجىن قورىعىنداعى قىزىل كىتاپقا ەنگەن قوقيقازداردىڭ مەكەندەيتىن جەرلەرىمەن تانىستى.
قوقيقازدىڭ الەمدەگى سولتۇستىكتەگى ۇيا سالاتىن ورنى قورعالجىن مەملەكەتتىك تابيعي قورىعىنىڭ اۋماعىنداعى اششى سۋلى تەڭىز كولىندە ورنالاسقان.
