قىتاي جۇما كۇنى ايدىڭ ارعى جاعىنداعى توپىراق پەن تاۋ جىنىستارىنىڭ ۇلگىلەرىن جيناۋعا ارنالعان ەكى ايعا جۋىق ميسسياسىنىڭ ءبىر بولىگى رەتىندە ۇشقىشسىز عارىش كەمەسىن ۇشىردى جانە مۇنداي ارەكەتتى جاساعان العاشقى ەل بولدى. سالماعى 8 مەتريكالىق توننادان اساتىن «چان'ەن-6» زىمىران تاسىعىشى بەيجىڭ ۋاقىتىمەن 17:27-دە (GMT 0927) وڭتۇستىك حاينان ارالىنداعى ۆەنچان سپۋتنيكتىك ۇشىرۋ ورتالىعىنان ۇشىرىلدى، دەپ حابارلايدى “ادىرنا” ۇلتتىق پورتالى.
چان'ەن 6 ايدىڭ ارعى جاعىنداعى وڭتۇستىك پوليۋس-ايتكەن باسسەينىنە قونادى، سودان كەيىن ۇلگىلەردى جيناپ، جەرگە قايتارادى. بۇل ۇشىرۋ قىتايدىڭ اي مەن عارىشتى زەرتتەۋ باعدارلاماسىنداعى تاعى ءبىر ماڭىزدى كەزەڭ بولدى.
«چانەن 6» ميسسياسىنىڭ عىلىمي ماقساتتارىنىڭ بىرىندە جۇمىس ىستەيتىن فرانتسۋز زەرتتەۋشىسى پەر-يۆ مەسلين: «قىتايدىڭ قىسقا ۋاقىت ىشىندە وسىنداي ءورشىل جانە تابىستى باعدارلامانى قالاي ازىرلەگەنى بىزگە جۇمباق»، - دەدى.
ۇشىرۋعا فرانتسيا، يتاليا، پاكىستان جانە ەۋروپالىق عارىش اگەنتتىگىنىڭ عالىمدارى، ديپلوماتتارى جانە عارىش اگەنتتىكتەرىنىڭ وكىلدەرى قاتىستى، ولاردىڭ اسپاپتارى چانەن-6 بورتىندا ايدى زەرتتەۋگە ارنالعان. اقش ۇيىمدارى ءوز جابدىقتارىن ورنالاستىرۋعا ءوتىنىش بەرگەن جوق، ويتكەنى اقش زاڭى قىتاي عارىش اگەنتتىگىمەن كەز كەلگەن ىنتىماقتاستىققا تىيىم سالادى.
زىمىراننان بولىنگەننەن كەيىن قۇرىلعى ايدىڭ وربيتاسىنا ءتورت-بەس كۇندە جەتەدى جانە ماۋسىم ايىنىڭ باسىندا جەر بەتىنە قونۋى كەرەك. كەمە جەرگە ورالماس بۇرىن ايدا ەكى كۇن بويى 2 كەلى سىناما جينايدى. قايتارۋ ىشكى موڭعوليادا وتەدى دەپ كۇتىلۋدە.
چان'ەن 5 اكەلگەن ۇلگىلەر قىتايلىق عالىمدارعا اي تۋرالى جاڭا مالىمەتتەردى بىلۋگە، سونىڭ ىشىندە جانارتاۋلىق بەلسەندىلىكتىڭ ۋاقىتىن دالىرەك انىقتاۋعا، سونداي-اق جاڭا مينەرالداردى اشۋعا مۇمكىندىك بەرەدى.
سونىمەن قاتار، چان'ەن 6 ايدا تۇراقتى زەرتتەۋ ستانتسياسىن قۇرۋ بويىنشا ۇزاق مەرزىمدى جوبانىڭ بولىگى: قىتاي مەن رەسەي باسقاراتىن حالىقارالىق اي عىلىمي ستانتسياسى(ILRS). مۇنداي ستانسانىڭ قۇرىلىسى قىتاي مەن ونىڭ عارىش كەڭىستىگىن تەرەڭ يگەرۋدەگى سەرىكتەستەرى ءۇشىن بەكىنىسكە اينالادى.
