وبلىس اكىمى دانيال احمەتوۆتىڭ ءۇرجار اۋدانىنا جاساعان جۇمىس ساپارى اياسىندا كاسىپكەرلەر مەن جاۋاپتى تۇلعالاردىڭ قاتىسۋىمەن الاكول جاعالاۋىن دامىتۋ جولدارى تالقىلانعان جيىن ءوتتى.
ايتا كەتسەك، الاكول جاعالاۋىن اباتتاندىرۋ جۇمىستارى 2016 جىلدان باستاپ جۇرگىزىلىپ كەلەدى. وسى ۋاقىت ارالىعىندا دەمالىس اۋماعى ءبىرشاما كەڭەيىپ، دەمالۋشىلار ءۇشىن وتە ىڭعايلى بولدى. الاكول جاعاجايىندا قازىرگى تاڭدا 333 كوممەرتسيالىق نىسان قىزمەت ەتەدى. ولاردىڭ قاتارىندا 175 دەمالىس ۇيلەرى، 2 قوناق ءۇي، 10 ءدامحانا، 2 مەيرامحانا، 29 دۇكەن، 56 دۇڭگىرشەك، 4 بار، 8 اسحانا، ءدارىحانالار مەن اكۆاپارك بار.
ايماق باسشىسىنىڭ ايتۋىنشا، كەلەسى جىلى دەمالىس جايلىلىعىنىڭ دەڭگەيىن ارتتىرۋ ماقساتىندا بىرقاتار ءىرى ينفراقۇرىلىم نىساندارىنىڭ قۇرىلىسىن باستاۋ جوسپارلانىپ وتىر. دانيال احمەتوۆ شاعىن جانە ورتا بيزنەس وكىلدەرىنە سالىققا سالعىرتتىق تانىتپاي، ءوز مىندەرىن ورىنداۋعا شاقىردى.
جيىن بارىسىندا بايانداما جاساعان شقو بويىنشا مەملەكەتتىك كىرىستەر دەپارتامەنتى باسشىسىنىڭ ورىنباسارى ەرجان كتانوۆتىڭ ايتۋىنشا، 11 كۇننىڭ ىشىندە جۇرگىزىلگەن تەكسەرۋدىڭ ناتيجەسى بويىنشا، 38 كاسىپورىننىڭ «كولەڭكەلى بيزنەسى» اشكەرەلەنگەن. 11 دەمالۋ بازاسى ەسەپكە الىنعان.
– 2018 جىلى بيۋدجەتكە 67,5 ملن.تەڭگە سالىق ءتۇستى. بيىل ونىڭ كولەمى 148 پايىزعا ارتىپ، ياعني، 100 ملن. تەڭگەگە جەتۋى ءتيىس. الايدا قازىرگى تاڭدا كەيبىر دەمالىس بازالارى تابىستارىن تولىق كورسەتپەي وتىر. قازىرگى ۋاقىتتا وكىنىشكە وراي، كاسىپورىندار كىرىستىڭ ءبارىن كاسسالىق اپپارات ارقىلى وتكىزبەيدى. سوندىقتان ونلاين باقىلاۋ-كاسسالىق اپپاراتىن ورناتۋ قاجەتتىلىگى بويىنشا ءتۇسىندىرۋ جۇمىستارىن جۇرگىزۋدەمىز، - دەيدى ەرجان كتانوۆ.
الاكول كولىنىڭ جاعالاۋىن اباتتاندىرۋ ماسەلەلەرى بويىنشا ارنايى جۇمىس توبى قۇرىلعان بولاتىن. ءۇرجار اۋدانىنىڭ اكىمى سەرىك ءزاينۋلديننىڭ ايتۋىنشا، 30 ميلليارد تەڭگەنى قۇرايتىن جوبالاردى جۇزەگە اسىرۋ جوسپارلانىپ وتىر. الدىمەن، مەردىگەرلەر الاكولدى دامىتۋعا باعىتتالعان باعدارلامانىڭ جوسپارىنا ساي، مۇندا تولقىنداردى ۇستايتىن قۇرىلعىلاردى ورناتىپ، سونداي-اق، ەكى شاقىرىمعا جۋىق جاعالاۋعا بەكىتۋ جۇمىستارىن جۇرگىزەدى. جوبا «مورپورت اقتاۋ» قۇرىلىسىنىڭ تاجىريبەسى بويىنشا سالىنادى.
جوسپارلانعان اۋقىمدى جوبالالار قاتارىندا سۋ قۇبىرلارى جەلىلەرى مەن سۋ جيناۋ قۇرىلعىلارىن تارتۋ، كارىز جۇيەلەرى مەن سۋ سۇزگىلەۋ ورىستەرىنىڭ قۇرىلىسى بار. سونىمەن قاتار، ماقانشى اۋىلىنان كوكتال اۋىلىنا دەيىن 110 كۆت-تىق ەلەكتر جەلىلەرىن تارتۋ مىندەتى تۇر.
بۇگىنگى تاڭدا ءۇرجار اۋىلىنداعى اۋەجايدىڭ ۇشۋ-قونۋ جولاقتارىن قايتا قۇرۋ بويىنشا جوبالىق-سمەتالىق قۇجاتتاما دايىن. جوباعا ساي، ۇشاقتار ەكى باعىت بويىنشا كىرەتىن بولادى. ال، جولاق ۇزىندىعىن 2100 مەترگە ۇزارتۋ، ەنىن 45 مەترگە دەيىن كەڭەيتۋ قاراستىرىلعان. جاڭا تەرمينال سالىنىپ، ساعاتىنا 70 جولاۋشىنى قابىلداۋعا مۇمكىندىك اشىلادى. جالپى، اتقارىلعان جۇمىستان كەيىن اتالمىش اەروپورتتىڭ 70-80 ورىنعا دەيىن اۋە ترانسپورتىن قابىلداۋ قاۋقارلىعى ارتادى.
– جىل بويى قىزمەت كورسەتەتىن ەمدىك-ساۋىقتىرۋ كەشەنىن تۇرعىزۋ ماقساتىندا جاقىن ارادا اۆستريالىق ارىپتەستەرىمىزدىڭ رادون سۋىن يگەرۋ تاجىريبەسىن قولعا الامىز. بۇگىندە ءبىز ءۇشىن وزەكتى ماسەلە - ول سەمەي مەن وسكەمەننەن الاكولگە دەيىنگى ارالىقتاعى جولدىڭ جاعدايى. قازىرگى ۋاقىتتا جوندەۋ جۇمىستارى ءجۇرىپ جاتىر. ەكى جىلدا اياقتاۋ جوسپاردا بار. قابانباي مەن الاكول جاعالاۋىنا دەيىن ۇزىندىعى 2,6 شاقىرىم، ەنى 6 مەتر ۆەلوسيپەد جولى سالىنادى. ءبىز ءوز تاراپىمىزدان ۋادە ەتكەن ءىستى ورىندايمىز. سوندىقتان كاسىپكەرلەردى دە جاۋاپكەرشىلىككە شاقىرامىن. ءورت قاۋىپسىزىدىگى مەن سانيتارلىق ەرەجەلەردىڭ قاتاڭ ساقتالۋىن دا نازاردان تىس قالتىرماۋ كەرەك - دەدى جيىندى قورىتىندىلاعان دانيال احمەتوۆ.
"ادىرنا" ۇلتتىق پورتالى
