Oblys ákimi Danıal Ahmetovtyń Úrjar aýdanyna jasaǵan jumys sapary aıasynda kásipkerler men jaýapty tulǵalardyń qatysýymen Alakól jaǵalaýyn damytý joldary talqylanǵan jıyn ótti.
Aıta ketsek, Alakól jaǵalaýyn abattandyrý jumystary 2016 jyldan bastap júrgizilip keledi. Osy ýaqyt aralyǵynda demalys aýmaǵy birshama keńeıip, demalýshylar úshin óte yńǵaıly boldy. Alakól jaǵajaıynda qazirgi tańda 333 kommerııalyq nysan qyzmet etedi. Olardyń qatarynda 175 demalys úıleri, 2 qonaq úı, 10 dámhana, 2 meıramhana, 29 dúken, 56 dúńgirshek, 4 bar, 8 ashana, dárihanalar men akvapark bar.
Aımaq basshysynyń aıtýynsha, kelesi jyly demalys jaılylyǵynyń deńgeıin arttyrý maqsatynda birqatar iri ınfraqurylym nysandarynyń qurylysyn bastaý josparlanyp otyr. Danıal Ahmetov shaǵyn jáne orta bıznes ókilderine salyqqa salǵyrttyq tanytpaı, óz minderin oryndaýǵa shaqyrdy.
Jıyn barysynda baıandama jasaǵan ShQO boıynsha memlekettik kirister departamenti basshysynyń orynbasary Erjan Ktanovtyń aıtýynsha, 11 kúnniń ishinde júrgizilgen tekserýdiń nátıjesi boıynsha, 38 kásiporynnyń «kóleńkeli bıznesi» áshkerelengen. 11 demalý bazasy esepke alynǵan.
– 2018 jyly bıýdjetke 67,5 mln.teńge salyq tústi. Bıyl onyń kólemi 148 paıyzǵa artyp, ıaǵnı, 100 mln. teńgege jetýi tıis. Alaıda qazirgi tańda keıbir demalys bazalary tabystaryn tolyq kórsetpeı otyr. Qazirgi ýaqytta ókinishke oraı, kásiporyndar kiristiń bárin kassalyq apparat arqyly ótkizbeıdi. Sondyqtan onlaın baqylaý-kassalyq apparatyn ornatý qajettiligi boıynsha túsindirý jumystaryn júrgizýdemiz, - deıdi Erjan Ktanov.
Alakól kóliniń jaǵalaýyn abattandyrý máseleleri boıynsha arnaıy jumys toby qurylǵan bolatyn. Úrjar aýdanynyń ákimi Serik Zaınýldınniń aıtýynsha, 30 mıllıard teńgeni quraıtyn jobalardy júzege asyrý josparlanyp otyr. Aldymen, merdigerler Alakóldi damytýǵa baǵyttalǵan baǵdarlamanyń josparyna saı, munda tolqyndardy ustaıtyn qurylǵylardy ornatyp, sondaı-aq, eki shaqyrymǵa jýyq jaǵalaýǵa bekitý jumystaryn júrgizedi. Joba «MorPort Aqtaý» qurylysynyń tájirıbesi boıynsha salynady.
Josparlanǵan aýqymdy jobalalar qatarynda sý qubyrlary jelileri men sý jınaý qurylǵylaryn tartý, káriz júıeleri men sý súzgileý óristeriniń qurylysy bar. Sonymen qatar, Maqanshy aýylynan Kóktal aýylyna deıin 110 kVT-tyq elektr jelilerin tartý mindeti tur.
Búgingi tańda Úrjar aýylyndaǵy áýejaıdyń ushý-qoný jolaqtaryn qaıta qurý boıynsha jobalyq-smetalyq qujattama daıyn. Jobaǵa saı, ushaqtar eki baǵyt boıynsha kiretin bolady. Al, jolaq uzyndyǵyn 2100 metrge uzartý, enin 45 metrge deıin keńeıtý qarastyrylǵan. Jańa termınal salynyp, saǵatyna 70 jolaýshyny qabyldaýǵa múmkindik ashylady. Jalpy, atqarylǵan jumystan keıin atalmysh aeroporttyń 70-80 orynǵa deıin áýe transportyn qabyldaý qaýqarlyǵy artady.
– Jyl boıy qyzmet kórsetetin emdik-saýyqtyrý keshenin turǵyzý maqsatynda jaqyn arada avstrııalyq áriptesterimizdiń radon sýyn ıgerý tájirıbesin qolǵa alamyz. Búginde biz úshin ózekti másele - ol Semeı men Óskemennen Alakólge deıingi aralyqtaǵy joldyń jaǵdaıy. Qazirgi ýaqytta jóndeý jumystary júrip jatyr. Eki jylda aıaqtaý josparda bar. Qabanbaı men Alakól jaǵalaýyna deıin uzyndyǵy 2,6 shaqyrym, eni 6 metr velosıped joly salynady. Biz óz tarapymyzdan ýáde etken isti oryndaımyz. Sondyqtan kásipkerlerdi de jaýapkershilikke shaqyramyn. Órt qaýipsizidigi men sanıtarlyq erejelerdiń qatań saqtalýyn da nazardan tys qaltyrmaý kerek - dedi jıyndy qorytyndylaǵan Danıal Ahmetov.
"Adyrna" ulttyq portaly
