شىمكەنتتەگى گاز قۇيۋ ستانتسياسىندا بولعان ءورتتىڭ سەبەبى انىقتالدى

2618
Adyrna.kz Telegram

شىمكەنتتە اۆتوتسيستەرنالاردى تولتىرۋعا ارنالعان گاز قۇيۋ ستانتسياسىنداعى ءورت سۇيىق وتىندى قۇيۋ كەزىندەگى تەحنولوگيالىق پروتسەستىڭ بۇزىلۋىنان بولعان. وقىس جاعدايدى ءبىر ايعا جۋىق زەرتتەگەن ارنايى توپ وسىنداي قورىتىندىعا كەلدى، - دەپ حابارلايدى "استانا" تەلەارناسى. 

ەسكە سالايىق، قايعىلى وقيعا 7 ماۋسىمدا بولعان ەدى. ءورت سالدارىنان 20 جاستاعى ەرلان انار قايتىس بولعان. دەنەسىنىڭ 98 پايىزى كۇيىپ قالعان مارقۇم وتباسىنداعى سەگىز بالانىڭ تۇڭعىشى ەكەن. ول گاز قۇيۋ ستانتسياسىندا وتكەن جىلدىڭ كۇزىنەن جۇمىس ىستەپ كەلگەن. زارداپ شەككەن وتباسىعا بەرىلەتىن ماتەريالدىق كومەك مولشەرى ازىرشە ايتىلمادى. ال تەكسەرۋ توبى شىققان قورىتىندىنى پوليتسيا دەپارتامەنتىنە جولدايدى. كوميسسيا توراعاسىنىڭ ايتۋىنشا، سيىمدىلىعى 60 تەكشە مەتر اۆتوتسيستەرنادان گاز قۇيۋ كەزىندە شلانگ تولىق بۇرالماي، اجىراپ كەتكەن. ول كەزدە ەكپىنى قاتتى گاز 20 جاستاعى وپەراتوردى ۇشىرىپ جىبەرگەن. ارادا ون سەكۋندتاي ۋاقىت وتەر-وتپەستەن شلانگ تەمىرى سوعىلىپ ۇشقىن پايدا بولىپ، جارىلىسقا اكەلگەن. اۆتوتسيستەرنا جۇرگىزۋشىسى قاشىپ ۇلگەرگەنمەن، وپەراتور جالىن ورتاسىندا قالىپ قويعان. دارىگەرلەر ءۇش كۇن ارپالىسقانىمەن 20 جاستاعى جىگىت باقيلىق بولدى. كوميسسيا مۇشەلەرى اپاتقا سەرىكتەستىك تاراپىنان جىبەرىلگەن بىرقاتار كەمشىلىك سەبەپ دەپ ءتۇيدى. "بريگادانىڭ قۇرامىن تولىق جاساقتاماعان. ەكى ادامنىڭ ورنىنا ءبىر ادامدى جۇمىسقا جىبەرگەن، نەگىزى سول. تەحنولوگيالىق ەرەجەلەر ورىندالماعان، وسى گاز تولتىرۋ جۇمىستارىنىڭ تەحنولوگيالارى جاسالماعان. ول تەحنيكالىق ەرەجەدە بارلىق ءتارتىبى، قانداي قاۋىپسىزدىك شارالارى بار، قالاي ىستەلۋى كەرەك - ءبارى تولىق جازىلۋى كەرەك. ونىمەن وپەراتور تانىستىرىلۋى قاجەت. سونى تانىستىرىپ وقىتۋ جاعى بۇل جەردە تولىق جۇرگىزىلمەي وتىر", - دەيدى قر يدم كوميتەتىنىڭ شىمكەنت قالاسى بويىنشا دەپارتامەنت باسشىسىنىڭ ورىنباسارى سارسەنباي تەڭلەسباي.

"ادىرنا" ۇلتتىق پورتالى

پىكىرلەر