قاراعاندىدا پلوگگينگكە قاتىسقان 100-دەن استام ادام فەدوروۆ سۋ قويماسىنىڭ اۋماعىن تازارتتى. جاستار جۇگىرۋگە قاتىسا وتىرىپ، 150 قاپ قوقىس جينادى.
- بۇگىن پلوگگينگ لەپ اتالاتىن تاماشا ءىس-شارا ءوتتى. ءبىر جاعىنان سپورتپەن شۇعىلدانامىز، ال ەكىنشى جاعىنان ءوز قالامىزعا پايدا اكەلەمىز. بۇل وتە كەرەمەت شارا! ءبىزدىڭ تۇرعىنداردان كوشەلەردى تازا ۇستاپ، قوقىس تاستاماۋعا جاۋاپكەرشىلىكپەن قاراپ، تابيعاتقا ۇقىپتىلىق تانىتۋدى سۇراعىم كەلەدى. ويتكەنى، قالامىزدىڭ تازا بولۋى ارقايسىمىزعا بايلانىستى”، - دەپ ەسەپتەيدى ەكولوگيالىق ەرىكتىلەر قوزعالىسىنىڭ جەتەكشىسى راحات رايىمبەكوۆ.
ەكواكتسيا "تازا قازاقستان" اياسىندا ءوتتى. وعان قاراعاندى جاستار رەسۋرستىق ورتالىعىنىڭ ەرىكتىلەرى، بەيسەنوۆ اتىنداعى قر ءىىم اكادەمياسىنىڭ قىزمەتكەرلەرى مەن كۋرسانتتارى قاتىستى. ءىس-شارا قالا اكىمدىگىنىڭ قولداۋىمەن ءوتتى. مۇنداي ەكواكتسيالار الداعى ۋاقىتتا ءالى دە جالعاسادى.
سونداي-اق، بۇگىن، 20 ساۋىردە جاستار، ەرىكتىلەر مەن قوعام قايراتكەرلەرى ويشىل اباي قۇنانباەۆ ەسكەرتكىشىنىڭ اۋماعىن، ال قارۋ ستۋدەنتتەرى ە.ا. بوكەتوۆ ەسكەرتكىشىنىڭ اۋماعىن تازالادى. قاراعاندى تەحنيكالىق ۋنيۆەرسيتەتىنىڭ وقىتۋشىلارى مەن ستۋدەنتتەرى اكادەميك ابىلقاس ساعىنوۆقا، قازىبەك بيگە، قانىش ساتباەۆقا ورناتىلعان ەسكەرتكىشتەردى رەتكە كەلتىردى. دەپۋتاتتار مەن قالالىق ءماسليحات اپپاراتىنىڭ وكىلدەرى جەڭىس ساياباعىندا جانە رەسپۋبليكا داڭعىلىندا تازالىق شاراسىنا قاتىستى.
ءاليحان بوكەيحان اۋدانى پروكۋراتۋراسىنىڭ قىزمەتكەرلەرى بەلگىلى كەنشى ءتۇسىپ كۇزەمباەۆتىڭ ەسكەرتكىشى اۋماعىن تازالاۋ جانە اباتتاندىرۋ جۇمىستارىن جۇرگىزدى.
قاراعاندى وبلىسىندا "تازا قازاقستان" اۋقىمدى ەكولوگيالىق اكتسياسى جالعاسۋدا. ءار اپتا بەلگىلى ءبىر تاقىرىپقا ارنالعان. وتكەن اپتا "كيەلى مەكەن" دەپ اتالىپ، كيەلى ورىندار تازارتىلىپ، تاريحي-مادەني ەسكەرتكىشتەردىڭ اۋماقتارى اباتتاندىرىلدى. كەلەسى اپتا “جاسىل ايماق" دەپ اتالىپ، اعاش ەگۋگە، اۋماقتاردى كوگالداندىرۋعا ارنالادى.
